Sv Britannia Total Finance/Gatorade ta gana 2 wega den 3 dia

ORANJESTAD - Diasabra ultimo Sv Britannia Frisian Flag / Bright Bakery ta piki 3 punto contra e muchanan di Madiki esta Riverplate ganando nan cu score minimo di 1-0 y diamars Sv Britannia Pizza Hut ta bolbe piki 3 punto for di Sv Estrella Digicel. Pa locual ta e wega di diasabra Sv Britannia Sports4All den un duelo fuerte ta logra gana Riverplate cu score di 1-0 pero un Riverplate cu no a entrega ningun momento y cu te hasta tabata merece un empate of te hasta un victoria. E gol di victoria pa Sv Britannia Bright Bakery a wordo anota pa Sebastian Montoya na di 30 minuut di e prome tempo. Carchi geelnan a bai pa; T. Ruiz, Luis Estrada, J. Ruiz, P. Baromeo, D. Donato y L. Kaarsbaan. Pe e team di Riverplate carchinan a bai pa; C. Quandt, J. Lacle, A. Grovel, Hamadi y A. Grovel. Den e wega aki lamentablemente e delantero di Riverplate Maurice Cohen a troce su rudia y mester a bandona tereno trempan. Nos ta desea Maurice un pronto recuperacion. Pa locual ta e wega di diamars e espectativa tabata halto pasobra Estrella Digicel cu tabata den bom di tabla di posicion y bin ta piki punto y poco poco ta saliendo for di e zona peligroso. Di otro banda Sv Britannia cu a conoce un cambio den staff tambe ta sigi piki su puntonan y ta trata di clasifica trempan pa playoff semi final. E opstelling di Sv Britannia Total Finance tabata; Lionel Kaarsbaan den gol, Dinni Mozo, Derwin Donato, Pierre Estiverne y Theric Ruiz den defensa, Miguel Gutierrez, Renier Paraez, Luis Murillo y Luis Estrada den medio campo y den delantero Sebastian Montoya y John Lugay. Den dougout tabata tin; Kendrick Dania, Carlos Caro, Margin Kock, JM Farro, Carl Geerman y Cristian Navarro. E wega a cuminsa y mes ora Estrella cu ta wordo dirigi pa Gregorio Lezama a cuminsa domina e wega y pone e team di Sv Britannia Gotorade bou di hopi presion y Sv Britannia Bright Bakery no tabata sa con pa sali for di e situacion ey. Por bisa cu Estrella a crea varios oportunidad di gol pero Estrella no a probecha. Ta na di 14 minuut di wega cu hoben Denrick Lopez ta anota e prome gol di anochi y ta manda su team Estrella ariba 1-0 y asina ta haci e oncena di Piedra Plat mas nervioso y asina tambe halftime a bai aden cu Estrella den ventaha. Den di dos mitar ta mustra cu staff technico di Sv Britannia Vitamalt a laba, guma y strika e hungadornan y diripiente e oncena di Piedra Plat a lanta for di soño y a bolter ful e wega. John Lugay ta empata e wega na di 49 minuut y John un biaha mas ta anota pa haci e wega 2-1 na di 54 minuut y mientras cu Luis Murillo pa medio di Gregory Raven ta anota e di 3 gol y Renier Paraez ta corona obra pa hasi e wega 4-1 na di 89 minuut. Di e forma aki tambe Sv Britannia Total Finance/Gotorade ta logra piki 3 punto mas y ta acumula 31 punto den 12 wega hunga y ta lider di campeonato na e momentonan aki. Garchi geel a bai pa Danni Mozo y John Lugay y pa Estrella Naibert Elizabeth, Liomar Croes mientras cu Carlos Geerman a haña dos biaha geel cu a bira un cora. E proximo wega di Estrella ta contra di Bubali mientras cu Sv Britannia Bright Bakery su proximo compromiso lo ta contra La Fama. Tambe nos por aprecia cu poco poco e fanaticadanan ta yegando stadion pa apoya nan respectivo teamnan.