Croes: Operador nobo di casino tin te 1 di maart pa firma acuerdo nobo

ORANJESTAD – E operador nobo di casino tin te 1 di maart pa firma acuerdo nobo. Minister di Labor Paul Croes a papia cu empleadonan di ex Aura Casino ora cu nan a bin presenta nan preocupacion na Oficina di Gobierno diahuebs mainta. E mensahe principal di e mandatario diahuebs mainta tabata cu e posicion di Gabinete Mike Eman II den e asunto aki no a cambia. “Nos ta para na banda di e trahadornan cu tur atencion y tambe comprension pa e situacion fastioso cu e ciudadanonan aki ta aden” Minister Croes a bisa.

SPLICACION AMPLIO

Croes a duna un splicacion amplio di con leu e esfuersonan ta y kico por spera, pero tambe Minster Croes a sa di contesta e pregunta di e diferente persona concerni. For di momento cu e casino a cera su porta Gobierno a reuni cu sindicato y departamento di labor pa yega na un solucion. E clausura abrupto di e casino a bin den un momento dificil cu tabata durante dianan di fiesta di fin di aña, pero tambe ta representa un trato inhusto pa e trahadornan. Ademas Croes a declara cu, como minister, pero tambe como tata di famia e comprension t'ey pa tur 44 trahado. “E no ta husto. Nos tur ta Arubiano, nos tur ta humano,” Croes a bisa indicando cu e ta compronde totalmente e dificultad financiero cu e ta trece cu ne.

DEADLINE NOBO PA OPERADOR NOBO DI CASINO

Segun palabracion haci hunto cu sindicato, e fecha limite pa e operador nobo firma acuerdo ta dia 1 di maart. Minister a indica cu esey ta aki 5 dia y cu e accion di e trahadornan ta muestra pa Barcelo y pa e operador nobo cu tin un presion grandi pa yega na un solucion lo mas pronto posibel. Croes ta sinti cu e presion di mas grandi aworaki ta cay riba e operador nobo cu ta esun cu mester firma, y e mandatario no ta keda man crusa, pero a bisa di ta sinta inmediatamente cu su colega di husticia, Minister Dowers pa hunto yega na cua ta e miho siguiente paso. A adelanta cu probablemente lo haci uso di e ley cu ta mara na e permiso pa operacion di e casino pa asina pone presion.