Andin Bikker ta nenga di a combersa cu Otmar Oduber pa liderazgo PDR

ORANJESTAD – Lider di partido PDR, Andin Bikker ta nenga di a combersa cu Otmar Oduber pa liderazgo di e partido di Bikker. Asina e politico y parlamentario ta bisa den un comunicado. “Awo cu a sali na cla cu minister Otmar Oduber claramente ta pensa riba su interes personal paso el a bay pidi tereno di huur pa "planta", diripiente e kier bin purba kita atencion lansando rumor falso cu mi persona lo a combersa cu ne pa bira lider di PDR y cu e lo tin mensahe di telefon dimi warda pa cu e rumor aki: nonsense!” Bikker ta bisa.

DOBLA PA MIKE EMAN

Segun Bikker, loke Oduber mester splica pueblo ta con el a dobla pa Mike Eman den un par di dia (pok, pok, pok, pok!) despues di su "9 puntonan" di un carta cu te dia di awe ta fantasma. “Den mi humilde opinion ta bisto cu el a gewoon dobla pa Mike Eman pa e haya cosnan personal” Bikker ta bisa. “ En bes di bruha tera mi ta reta Otmar Oduber pa e contesta riba mi ponencia cu el a actua contra articulo 3:14 di Codigo Civil, contra principionan di bon gobernacion y di integridad dor di pidi un tereno pa su mes pa supuestamente bay planta. Den e proceso ey el a expone pais Aruba na un otro posibel Koninklijk Besluit, awo riba tema di integridad, y tambe na claimnan huridico, ya cu tin hopi hende humilde cu no ta minister amigo di minister Sevinger, cu a solicita pa tereno di huur hopi prome cu Otmar Oduber y nunca a haya un "dezerzijds akkoord" den un tempo record!” Bikker ta sigui bisa.

CUIDA MANGEL

Segun Bikker, Oduber ta suppose di cuida mangel y el a a bira come for di e caha. “ PDR no ta interesa den tipo di gobernante asina: pakico Otmar Oduber no a cumpra un tereno eigendom, si ta planta e kier bay planta? Dicon e mester haya preferencia riba e pueblo humilde pa haya tereno di huur? Otmar Oduber no ta sinti den su fibra como un ser humano cu ta suppose di sirbi Pueblo, cu loke el a haci no por? Mi reaccion mester a afecte hopi duro pa el a baha na un nivel asina, pero anyway, e tin titulo di bully, dus eigenlijk no por spera mucho mas nivel” Bikker a finalisa bisando.