Comportacion OM den caso Mitch Henriquez no ta manera mester ta den democracia

HILVERSUM – Gerald Roethof, un di e abogadonan di e famianan di defunto Mitch Henriquez, ta irita pa e manera di comporta di Ministerio Publico (OM). Na un encuentro riba 29 di februari e abogadonan di e cinco polisnan sospechoso den e caso por entrega nan deseonan pa investigacion. Esaki ta tuma luga tras di porta cera. E abogadonan di e famianan, contra di Roethof su gana, tampoco no tin acceso.

SESSION CERA

Segun OM ta regla den ley cu un session di direccion ta cera. “E ta forma parti di un investigacion cu ta core ainda. Pa no stroba e investigacion aki, e ta tuma luga tras di porta cera: solamente ku hues-comisario, fiscal y e abogado di e sospechosonan”, asina vocero Ilse de Heer a bisa.

Roethof: “Ta OM a scoge esaki. Ami lo a prefera di mir’e diferente. A lucha hopi pa huicio penal publico, manera mester ta den un comunidad democratico. Esaki no tin mi preferencia anto mi ta expresa mi mes eufemistico.”

SIGUI CRITICAMENTE

“Como abogado di e victima of e famianan ta lastima cu bo rol ta limita”, Roethof ta sigui. E por imagina su mes si kico e lo a hasi si e tabatin acceso. “Lo mi a sigui un ke otro criticamente. Lo mi a trata di splica e fiscal kico no ta klop asina mi mira ki direccion e abogado di e sospechosonan ke cue.” OM no ke reacciona riba e pregunta si e ausencia di e abogado di e victima no ta un oportunidad perdi. Tampoco OM no ke contesta e pregunta cu t’ asina cu e polisnan sospechoso nan privacidad ta miho proteha pa causa di nan profesion.

No ta prome biaha cu OM ta haña hopi critica. Dia Mitch Henriquez a fayece na juni di aña 2015 pa causa di violencia di polis OM a haña critica pasobra nan a tuma un declaracion di prensa, cu a bini di polis, offer sin cambi’e. Polis a bisa cu Henriquez a bira malo den un bus di polis pero imagennan di camara a mustra cu no tabata berdad.

SLOW

Na november di 2015 Richard Kòrver, un otro abogado di e famianan, a critica e sistema slow di traha di OM. Ainda OM mester di diferente luna mas pa tuma un decision tocante un eventual persecucion. “Pero no por bisa exactamente cuanto mas.”

Ret Caribense   Autor Pieter Hofmann