Ta vigilando establecimentonan cu ta importa chuculati Mars den region

AMSTERDAM /ORANJESTAD/ WILLEMSTAD– Ainda no por bisa si e caso di e recall di chuculati nan popluar manera Mars y Snickers ta afecta Aruba tambe. For di ayera, e fabrica na Hulanda cu ta produci e chuculatinan aki a haci un recall (revoca) di e chuculati nan aki for di por lo menos 55 pais. Esaki ora cu a haya un pida plastik den un di e baranan. E fabrica no ta descarta cu tin mas chuculati cu e plastic den e bara. E no ta algo mortal, pero un persona por stick si cu ne.

REACCION CORSOU

Na Corsou e ministerio di salud a mustra cu ‘ta vigilando establecimentonan y bendedonan di productonan di chuculati di e marcanan aki, y mester stop nan benta mesora’. Ta trata di esnan cu tin fecha entre 19 di juni 2016 pa 8 januari 2017 como fecha di vencemento.

REACCION ARUBA

Mientras cu intento pa haya e info di parti di departamento higienico no tabata disponibel awe mainta, NoticiaCla.com a compronde cu mientras cu mayoria di e importacion di e chuculatinan ta bin for di Merca, tin tambe cu ta importa esaki for di Hulanda. Ta solamente esnan for di Hulanda tin chuculati afecta y cu a haci e ‘recall’.