No tin claridad ainda riba ken ta reemplaza nos actual gobernador

ORANJESTAD – Cu un siman faltando pa e luna di februari pasa, ainda no tin ningun informacion concreto riba e proceso pa nombramento di un gobernador nobo. Manera ta conoci e termino di gobernador Fredis Refunjol ta vence e aña aki y mester pone un otro persona ya cu sr Refunjol ya a core dos termino di 6 aña cada un. Oficialmente gobierno no por a informa NoticiaCla.com riba e topico aki. “No tin ningun informacion pa duna” tabata e contesta cu NoticiaCla.com a ricibi awe mainta. Di otro banda, tin un lista cortico (short list) di nomber ta circulando, mientras cu mayoria di e nombernan riba e lista ta poni sin conocemento di e persona mes. Por lo menos segun nan version.

PROME MINISTER EMAN

Tabata luna pasa ainda cu riba e pregunta aki, prome minister Mike Eman a bisa cu ta mas sigur cu pa luna di februari lo tin e proceso cla (y cu posiblemente nombernan di e candidatonan), pa informa Hulanda di ken gobierno di Aruba ta postula pa e funcion. Finalmente ta gobierno di Reino tin cu aproba e nomber aki. Na e ocasion ey, Eman a confirma cu enberdad tin un lista, y cu tin politico, no politico y otronan riba e lista ey tambe. Pero no kier a bay asina leu di duna nombernan concreto.

SHORT LIST CU TA CIRCULA

Informacion cu NoticiaCla.com tin, ta cu esun cu ta lidera e lista awor di candidato, ta actual minister di husticia Arthur Dowers, sigui pa Jane Semeleer (actual presidente di Banco Central), Andy Lee (actual minister plenipotenciario na Wasthington), Edwin Abath (actual director Directie Buitenlandse Betrekking), Marisol Lopez (presidente Parlamento), y Alfonso Boekhoudt (actual minister plenipotenciario na Hulanda). For di e lista in oficial aki, esun mas menciona cu e chens, ta Dowers.

REACCION DI PERSONANAN

NoticiaCla.com a acerca algun di e personanan aki, unda cu mayoria di nan a actua sorprendi cu e noticia. Algun a mustra disponibilidad mientras cu otronan a hari ora cu a tende esaki. “Mi no sa mes cu mi nomber tabata circula”, tabata un reaccion. Un otro candidato tabata interesa pero a bisa “mi tin cu evalua kico ta miho aworaki”. Otronan a simplemente hari y a contesta “Bo sa mas cumi”. Un di nan a mustra cu nan ta enberdad interesa, pero cu nan no a dicidi ainda si nan ta bay pe pasobra tin mas opcion pa scohe di dje.

TEMPO TA CORE

Hecho ta cu e tempo ta coriendo y cu dentro di poco mester presenta un nomber pa por keda cla cu e nombracion na tempo. Di otro banda, si pa ora cu e tempo di sr Refunjol vence y no tin un candidato apunta, e gobernador interino lo tin cu tuma e funcion te ora cu un candidato keda apunta.