Atraco arma riba trahado di Don Jacinto diamars anochi

ORANJESTAD – Tres homber cu cara tapa y cada uno cu un arma di candela, a atraca trahado di Don Jacinto Restaurant y Kico Rico Restaurant diamars anochi y bay cu riba 10.000 florin. Vocero di polis Liliana Rasmijn a confirma na NoticiaCla.com awe mainta cu e melding a drenta 11:06 na centrale post. A manda patruya hunto cu atraco team y personal di slachtoffer hulp na e compleho di apartamento na Laurens Costerstraat.

ASALTO

Aki a bin topa cu un señora y su amigo cu a declara cu ora cu nan a yega e apartamento, nan a wordo asalta pa tres homber arma cu cara tapa pidiendo pa e placa. Nan a pone e armanan na cabes di e personanan ora cu a pidi e placa. Fuera di esey, e personanan a ‘coba rond’ den e apartamento, pero a bay primordialmente cu e suma di placa, cu ta e placa di dia di e dos establecimentonan menciona. Un detaye cu a logra saca for di e señora tambe, ta cu un di nan tabata papia spaño, mas sigur esun cu a pidi pa e placa. E personanan a bandona e sitio y no a logra pone man riba nan ainda. Mientrastanto personal di slachtoffer hulp a atende cu e dos personanan cu a keda asalta. Polis a pidi pa cualkier persona cu por a mira algo, pa tuma contacto cu nan via tiplijn 11141.