Lo bisa hotelnan cu 1 di juli ta cuminsa enforsa beach policy

ORANJESTAD – Entrante 1 di juli, lo cuminsa enforsa e ‘beach policy’ na Aruba, cu ta encera controla e beachnan na Aruba particularmente esnan unda cu tin hotel ariba. Segun minister di turismo Otmar Oduber, tur hotel lo haya un notificacion aworaki cu nan tin te cu 1 di juli pa regla nan asuntonan di permiso, pa despues e controlnan mes cuminsa pa e fecha menciona. E ta conta tambe pa tur e vendornan riba beach cu ta bende nan productonan pa comunidad.

FRUSTRA ACTIVIDAD ILEGAL RIBA BEACH

E ta importante segun Oduber, pa asina sigura e calidad di nos beachnan y calidad di turista y e critica cu tabatin riba entre otro e ‘trafico’ riba beach di tur vendor y otro asuntonan iregular/ilicito. A palabra hunto cu colega Sevinger den conseho di minister, cu Oduber lo bira e ‘trekker’ di esaki (a traha hunto pa 2 aña), den comunicacion cu Sevinger. A reuni cu Departamento di Infrastructura y Planning (DIP). Otro siman lo reuni cu tur instancia concerni. Tin henter un planificacion hinca den otro cu tin cu resulta den e control pa 1 di juli por tin e control riba e beachnan pa e maneho nobo.

NOTIFICACION PA TUR PARTIDONAN CONCERNI

Lo manda un carta pa tur hende, tur watersport operator, tur hotelnan cu tin nan propiedad riba beach, pa asina nan tur ‘reaplica’ pa nan permiso cu nan tin aworaki, conforme e cambionan anuncia publicamente pa e ultimo 2 aña y mei. Den e periodo ey nan lo haya contesta tambe riba nan peticion nobo cu ta wordo haci. Tambe e expedicion nobo pa por opera riba beach conforme e reglanan cu tin cu ta esnan cu a combersa cu mayoria di e watersport operatornan como tambe diferente hotelnan.

CAMBIONAN STRUCTURAL RIBA BEACH

Esaki ta encera tambe hopi trabou operacional pa e hotelnan unda cu hopi di nan lo tin cu bay reglamenta y elimina cierto palapa nan, schuif nan, y tambe e barnan cu tin riba beach. Segun e mandatario, durante e ultimo dos añanan a inventarisa tur esaki, combersa cu tur y cu e ehecucion ta bay cuminsa pa 1 di juli, unda cu DIP, DOW, strand politie, maritime politie, directie scheepvaart, lo cuminsa eherce e controlnan riba beach. Tur esey basa riba e restructuracionnan riba e beach pabou di brug y henter area di hotel.