Oduber: Berdad mi a pidi tereno, pero no a haya nada ‘ainda’

ORANJESTAD – Te ainda e no a ricibi ningun tereno y no a haya notificacion cu tin tereno pe tampoco. Asina minister Otmar Oduber a reacciona na NoticiaCla.com over di e asunto di tereno cu el a pidi. E ta admiti cu aña pasa el a haci un peticion pa un tereno, y cu esey no ta nada abnormal. E ta mustra cu riba su mesun pagina di Facebook el a pone cu el a pidi pa un tereno pa huurgrond, y no un tereno pa un negoshi of erfpacht den Paradera serca di Tamarijn unda cu e ta biba. “Te dia di awe, mi no a haya un contesta riba dje” Oduber ta sigura NoticiaCla.com. Apesar cu e mandatario (di infrastructura) a duna su ‘ok’, esey no kier men cu e ta un garantia cu e ta haye. Ta mas bien un cooperacion su colega a pidi e departamentonan pa cu e asunto aki. Pero e akkoord no kier men cu e ta un garantia.

NO A HAYA CONTESTA AINDA

“Apesar cu mi a pidie for di aña pasa, te dia di awe mi no a haya un contesta riba e pida tereno aki” Oduber a bisa. El a tende y refuta tambe cu nan lo a kita un tereno di hende pa duna e mandatario. Algo cu e no ta na altura di dje. Tampoco e asunto cu e lo tin un tereno pidi di 55 mil meter cuadra cu e lo a ricibi. E ta normal si cu a pidi un tereno entre mil cu dos mil meter cuadra cu ta normal cu ta wordo duna pa agricultura. Loke e sa ta cu pa e ultimo 3 añanan tin un maneho di tereno di hendenan cu no ta wordo uza, cu un persona ta haya entre mil te 2500 meter cuadra. “E tin cu conta tambe pa ministernan ora cu nan pidi”.

PAKICO NO WARDA TE ORA BAHA COMO MINISTER

A puntra e mandatario pakico no a opta pa warda te ora e baha como minister, pa evita netamente un situacion unda cu ta kere cu ta hungando faboritismo entre colega minister y cu por beneficia otro. “E impresion ta pa esnan cu kier pens‘e asina” Oduber a contesta. E ta mustra cu e peticion a pasa tur departamento concerni. “Nada for di regla manera cu cualkier ciudadano di Aruba por ricibi. Ta mescos cu si mañan un hende cu ta minister ta pidi un tereno erfpacht pa e traha un cas, den e caso aki ta un peticion haci. Si e ta obtenibel, mi lo haya un contesta positivo, y si e no ta obtenibel, mi ta kere cu mi lo haya un contesta cu den e area ey no tin, y lo mi pidi pa un otro area e ora” Oduber a sigui bisa. “No ta un ayudo mi a pidi di un colega whatsoever. Porta e mentalidad di un otro partido, manera MEP ta kere cu lo nos ta actua asina. ‘Piensa el ladron que todas son de su misma condicion’, ta loke ta biba serca MEP” Oduber a bisa.

CRITICA RIBA TARDANSA PA HAYA UN TERENO

Ora cu e noticia a keda publica inicialmente, e critica cu a bin mesora tabata di hendenan cu tin añanan ta wardando un pida tereno (12 aña of mas) sin cu nan por bin na remarke y ta wordo bisa cu e wachtlijst ta largo y por dura por lo menos 11 aña prome cu nan bin na remarke. E hendenan cu ta pasando den e ‘odisea’ of ‘caminda di cruz’ pa haya un tereno, no tabatin nada di bon palabra pa e acto di minister Oduber. A mustra cu esaki ta un asunto di fix di un minister pa otro. Algo cu awor ta wordo cuestiona pa nan. Riba esey tambe e mandatario a reacciona: “Bon, manera mi a bisa, te ainda mi no a hapidiya nada tampoco. Esun cu sa unda mi a haya un tereno, por fabor bisami. Porta e ambtenaar cu ta traha den departamento ey lo tin mas informacion cumi. Mi no sa con grandi e tereno lo ta, ni na unda mi lo a haya un tereno. Dicon, pasobra mi a hacie masha habri”. Pa loke ta e hendenan cu ta wardando hopi aña, e mandatario ta mustra cu gobierno ta canando un proceso. “Hopi tereno nos a duna durante e ultimo añanan. Ta parti di e maneho di Santa Rosa. Tin naturalmente tambe e maneho pa hendenan cu pa hopi aña tabatin terenonan grandi di 20 pa 30 mil meter cuadra di huurgrond cu no ta wordo uza. DIP su maneho ta cu nan ta bay y ta bisa e persona cu e tereno lo no keda di nan si no use”.

MINISTER RIBA WACHTLIJST

A puntra si e mandatario ta riba un ‘wachtlijst’ of si esaki ta diferente pasobra e ta un minister. “Absolutamente. Pasobra sino minister lo tabatin e caba. Sino mi lo tabatin e tereno riba mi nomber caba, y lo mi tabata plantando caba. Aunke cu e stempel ta mustra riba e carta cu a aproba esaki di un minister pa otro, e minister ta mustra cu esey no ta nifica cu el a haya e tereno. “E ta un procedura masha normal, unda cu minister di infrastructura a bisa na varios occasion cu hendenan cu ta bishita, e ta bisa di su banda cu si no tin precupacion, pero ta pidi medewerking di e departamento. Si e departamento no por duna medewerking pasobra no tin tereno den area of no tin tereno, mi lo wordo notifica manera tur otro hende, cu no tin y si tin, mi ta spera cu mi tambe ta haya uno pasobra mi tambe haya uno. Mi ta politico berdad pero mi no ta un criminal. Mi ta un mesun Rubiano cu cualkier otro cu tin derecho di haci un peticion. E ta un derecho pa haci un peticion pero esey no ta nifica cu automaticamente mi ta haye. Mi ta spera mi haye si”, e mandatario a finalisa bisando.