Introduccion di parkeermeter na Palm Beach lo conoce otro retraso

ORANJESTAD – E proyecto pa introduci parkeermeters na Palm Beach ta conoce otro retraso. Minister di transporte Otmar Oduber a confirma dialuna na NoticiaCla.com, cu awor e intencion ta pa inicia e parti aki pa mitar of final di april/mei di e aña aki, en bes di maart manera cu a wordo bisa inicialmente. E motibo ta cu no a keda cla cu e preparacionnan pa por introduci e proyecto. Un di e motibo pa e tardansa, ta destinacion di dos tereno pa por ofrece e ‘social parking’ pa trahadonan cu no ta traha na hotel den e area. “No tin'e awor, y tin cu crea e areanan ey ainda” Oduber a sigui bisa.

TERENO PA PARKEER SOCIAL

Segun e mandatario, su colega minister (Sevinger) ta buscando e terenonan necesario pa esaki awor. E intencion ta cu mescos cu a haci na Playa, unda cu a provee e posibilidad pa trahadonan haya un area poco mas leu di nan trabou pa por parkeer toch contra un suma mensual. E intencion ta pa crea e posibilidad pa un total di 200 pa 250 auto por parkeer ‘social’ eynan. “Despues por cuminsa cu e proceso mas cerca di e hotelnan, di e centro comercial cu e preparacion pa e parkeermeters. “Mi no ta kere (cu e ta keda cla pa maart). Mi mes lo bisa mitar pa final di april, mas tarda mei”. Segun Oduber, a papia cu AHATA caba riba e tema y tur cos ta parce di ta ok. E intencion ta pa ofrece parkeermeter pa turistanan por parkeer mas controla eybanda, y lo emplea tambe 5 pa 8 parkeerwachter cu tin cu vigila e trabou ey. Ademas lo ubica un otro oficina di Aruparking eynan pa por maneha e operacion mas miho for di eynan mes.

INTRODUCCION NA PLAYA

Na luna di september aña pasa a introduci parkeermeter na Aruba na Playa, y e intencion tabata cu ora cu aña bolter (e aña aki) cu lo a introduci e mesun parkeermeter pa e area di hotelnan. Inicialmente a papia di februari, y despues a sigui move esaki mas. Aworaki ta mustra pues cu esaki lo bira te fin di april, comienso di mei.