Jonathan Thiel y Janiro Eisden reconoci como embahador di bon boluntad

ORANJESTAD - Dialuna atardi minister Otmar Oduber tabatin e placer di entrega un reconocemento na dos artista Arubiano cu ta contribuyendo grandemente cu promocion di Aruba y ta engrandeciendo nos cultura, Jonathan Thiel (Biggie) y Janiro Eisden. Presente tabatin representantenan di ATA y Departamento di Cultura hunto cu prensa y staf di Ministerio di Cultura, kende a disfruta di un bunita interpretacion di e cancion nobo ‘Dushi Bida’.

AMOR PA NAN PAIS

Oduber a indica cu e artistanan aki ta demostra un amor masha grandi pa nan pais y ta duna tur loke tin di duna. “Ohala Dios sigui bendiciona boso cu e talento cu boso tin”.

EMBAHADOR BON BOLUNTAD

Den nomber di Gobierno di Aruba, Ministerio di Cultura, Oficina di Turismo di Aruba y Departamento di Cultura Minister Otmar Oduber a entrega na tanto Jonathan Thiel como Janiro Eisden un certificado di Embahador di Bon Boluntad como muestra di aprecio pa nan contribucion pa promove Aruba como destinacion turistico y nos cultura.

E mandatario a indica tambe cu e cancion cu nan saca ultimo, Dushi Bida, a pone hopi hende reflexiona riba con nos ta biba aki na Aruba, e One Happy Island cu tabata buscando pa nos mesun hendenan sinti'e.

PRESENTE NA ARUBADAG

E tabata un rato hopi ameno unda tur presente a disfruta di e cancion Dushi Bida y na final Minister Oduber a duna e gran noticia cu tanto Jonathan Thiel como Janiro Eisden lo ta na Hulanda dia 20 di maart pa Arubadag.