Discrepancia compania di seguro y dept enseñansa perhudicando ‘beursalen pa Hulanda’

ORANJESTAD – Studiantenan saliendo pa Hulanda e anja aki lo no tin informacion corecto y completo riba nan asunto di seguro. Por lo menos segun e compania cu ta encarga cu nan seguro. Boogaard Assurantien NV a reclama cu prome biaha den 20 anja (e tempo cu nan ta encarga cu e aseguro pa e studiantenan), tin algo cu lo a pasa cu Directie Onderwijs lo no a duna e compania di seguro e oportunidad pa informa e studiantenan riba e proceso necesario. Mes momento e instancia ,-segun Boogaard-, lo a critica e compania di seguro di un forma completamente infunda.

Segun Boogard, apenas dialuna ultimo (29 di juli), Directie a manda un email pa e compania di seguro na Hulanda cu e participacion cu pa e aña aki atrobe tur studiantenan di Aruba cu un Aruba lening cu ta bay studia na Hulanda, ta wordo sigura na e compania aki.

“En vista cu ya dia 5 di augustus nos studiantenan lo ta viahando, no tin tempo mas pa haci un presentacion debido ni extenso riba e derechonan cu e seguro aki ta brinda nos studiantenan” e compania hulandes ta reclama. Nan ta mustra cu nan ( Boogaard Assurantien) lo a desea di por tabatin e oportunidad aki. Como tal a dicidi pa haci esaki pa medio di un comunicado di prensa cu e informacion necesario. (lesa e comunicado cu e puntonan aden aki). NoticiaCla a tuma contacto cu Directie Onderwijs pero no a logra haya nan reaccion riba e asunto aki ainda.