Hooyboer: Studia na Canada ta un opcion atractivo pa studiantenan di Aruba

ORANJESTAD - Minister di Enseñansa tin como un di su metanan principal pa ofrece mas tanto informacion y opcionnan pa un estudio superior localmente y internacionalmente pa studiantenan di Aruba. Studiando na un nivel di Bachelor of Masters na Canada ta un opcion cu varios studiante den pasado y actualmente ta probecha di dje. E interes ta creciendo pa e escogencia aki na Aruba, y pa yuda studiantenan y nan mayornan scoge pa un estudio superior basa riba informacion completo y corecto ta actualmente na Aruba dos representante di e Embahada di Canada na Caracas, Venezuela.

SESSION DI INFORMACION

Diamars 23 di februari 2016, e representantenan di e Embahada y Minister di Enseñansa di Aruba ta organisando un sesion di informacion na e College zaal di Colegio EPI for di 7'or pa 9'or di anochi pa tur mayor y hobennan considerando un estudio superior na Canada. Hooyboer-Winklaar a splica despues di un reunion cu e Embahada, cu nan lo ofrece informacion encuanto di rekisitonan, opcionnan, estudionan, y calidad di Enseñansa, pero tambe e partinan logistico manera vivienda y e posibilidadnan pa e studiantenan combina estudio cu trabou.

SISTEMA DI ENSEÑANSA EXITOSO CANADES

Canada ta un pais cu un sistema di Enseñansa exitoso cu ta brinda bon oportunidadnan, y ta sigur un bon opcion pa considera si nan ta desea di keda studia un poco mas cerca di cas, segun Hooyboer-Winklaar. E minister ta subraya cu ta hopi valioso pa yuda e studiante tuma un decision tocante di su futuro estudio y carera basa riba informacion corecto y completo, y esaki ta conta pa cualkier pais y cualkier estudio. Trade Commissioner pa e gobierno Canades na e Embahada na Caracas Venezuela, esta Victor Stott ta lidera e sesion di informacion na EPI, unda cu e lo contesta tambe cualkier pregunta di parti di e hobennan y nan mayornan.

MATCH OPORTUNIDAD

E reunion inicial cu Hooyboer-Winklaar, e ta splica, tabata pa papia tocante di factornan cu cual e embahada por logra "match" oportunidadnan entre Aruba y Canada pa studiantenan di Aruba bay scol na Canada. El a menciona topiconan specifico manera Ingles y Frances como un di dos idioma, pero tambe estudionan completo na Collegenan y Universidadnan Canades. Victor Stott a conclui bisando cu nan kier haci posibel pa uni sinergianan y traha hunto pa yega na acuerdonan entre universidadnan di Canada y Aruba pa un tarifa competitivo pa studiantenan di Aruba.