Huib van Bockel: Conoce e realidad nan nobo di mercadeo

ORANJESTAD - E aña aki e orado invita tabata Sr. Huib van Bockel cu a duna un charla tocante di e cambionan cu ta tumando lugar den e mundo di social media y e mensahenan pa con pa transforma un “Brand” of marca di compania den uno cu hopi fanatico. Huib van Bockel ta escritor di e buki “The Social Brand” den cual e ta splica e scenario di tanto e consumidornan como e companianan ta enfrenta awendia cu ta yen yen di informacion y propaganda.

PROBLEMA PA MANDA MENSAHE AFO

El a splica cu awendia nos tin un problema pa manda nos mensahe pa e publico eyfor ya cu bo ta core e risico cu e consumidor ta fada di e propagandanan cu ta bombardi’e tur dia riba medio social. E risico ta cu e por blokea bo mensahe fisicamente, of e por blokea e mensahe mentalmente, of e no tin confianza den e brand. E manera di haci propaganda riba billboard banda di caminda, a pasa pa e media social den mesun formato. Esaki no ta traha mas.

E RETO

E reto ta bira e ora pa e companianan bay mustra nan consumidornan cu nan ta “care” of cu nan ta stima e consumidor pues mustrando nan den forma di yudansa of compromiso cu loke nan ta gusta of stima. E “Brand” mester bay ta mas envolvi y duna bek den e comunidad, no necesariamente cu placa, pero den formanan cual por yuda esnan cu ta cliente. E no ta trata di mester ta riba e rednan social di awendia, sino di ta mas social. Con mi por ta mas envolvi cu e hendenan y duna loke nan realmente ta desea y comparti cu otro. El a duna algun ehempel di companianan cu segun e, ta haciendo bon, door di pone den nan mision algo pa tur hende por identifica nan mes cu ne.

EXPERIENCIA DI VAN BOCKEL

Sr. van Bockel ta un Hulandes biba na London cu tin un experiencia na companianan manera MTV Networks y Red Bull. Como hefe di mercadeo di Red Bull, el a hunga un rol importante den e transicion pa haci e compania un imperio di media cu e ta awendia. Despues di traha pa Red Bull, e mes a bay crea su propio bebida di energia cu el a yama: Tending, cual ta un bebida organico cu menos sucu aden. Den su charla, el a mantene tur atencion di esnan presente y varios momento a crea harimento den e sala den e forma cu e tabata trece su puntonan padilanti.