Roland Croes: Nos mester cambia nos manera di haci negoshi

ORANJESTAD - Durante e “Business Event 2016” Director di SETAR a duna un discurso den cual el a repasa e prestacion di e compania SETAR y den cual tambe el a amplia riba su pensamento y metanan pa e proximo temporada. Sr. Croes a expresa su preocupacion cu mas y mas companianan di telecom ta keda wordo ataca door di productonan y companianan gigante (Google, Amazon, Facebook, Whatsapp etc) cu ta haci uso di e infrastructura sin paga p'e.

ACEPTA REALIDAD DI BIDA

Croes a sigui elabora cu den su manera di pensa “nos mester cuminsa na acepta e realidad di bida. No tin nada cu nos compania por haci contra e fenomeno aki. Pero si nos no cambia nos manera di traha bo ta core e risico cu bo ta bira un “commodity”. No ta garantia cu lo por evita esaki, pero sin embargo keda sin haci nada lo acelera e proceso aki”.

USO DI WHATSAPP A AFECTA ENTRADA DI SETAR

Sr. Croes a bisa tambe cu tin un saturacion den tur parti di e negoshi di Telecom. E uso di aplicacionnan manera Whatsapp y e movilidad di awendia ta pone cu e entradanan di yamadanan y SMS ta baha.

SETAR ta contento cu LTE a keda bon ricibi na Aruba.

“Nos meta primordial ta pa un persona por ta conecta pafor y tambe paden di su cas, tur ora. E red di LTE ta subi e speednan di download te cu 50 Mbps. E aumento di speed aki ta pone un presion riba e compania pa keda up to date cu e peticionnan. SETAR ta brinda e speed di mas halto aki den Caribe, Sur America y America Central. E posicion di Aruba ta number 47 den mas di 200 paisnan den e mundo. Y cu e speed upgrade di 100 Mbps download pa residentenan y 750 Mbps pa e sector comercial, nos meta ta pa posiciona nos mes den e top 15% den e mundo. Hopi cerca di Merca y Canada.”, asina Croes a splica.

“Nos lo continua cu e trabounan di upgrading pa nos clientenan y treciendo lo ultimo den tecnologia nan di internet y nos meta ta pa tur cliente por gosa di te cu 100 Mbps y mas halto.”

EXPANSION CANALNAN DIGITAL

Sr. Croes a bisa cu otro plannan cu tin ta pa expande e 64 canalnan HD pa 100 canal HD pa e servicio di Cable Digital. Mirando e desaroyonan riba e tereno aki tambe Croes a enfatisa cu pasobra e cliente ta unico, nos mester ta flexibel. Y corda cu pasobra e cliente por “kies”, abo mester ta e mihor escogencia p'e.

“Educacion continuo ta keda algo esencial pa e sobrevivencia di nos compania. Nos ta conta riba nos empleadonan pa nan keda siña constantemente riba nan mes pero tambe nos ta inverti substancialmente den training pa nan. Inversionnan lo continua cu un total di 30 miyon den 2016. Den e ultimo 3 añanan SETAR a inverti alrededor di 150 miyon florin. Nos a haci algun inversionnan strategico y na tempo y nos tin e confiansa cu nos ta den bon condicion cu nos infrastructura pa e proximo añanan. Duna e cliente e mihor experiencia posibel ta hopi halto riba nos lista y tur decision encuanto di inversion lo tene cuenta cu esaki. Pa e sector di Comercio, nos lo ta ofreciendo un data center specialmente diseña pa un ambiente di negoshinan chikito.

Roland Croes a bisa cu SETAR ta hopi activo den implementacion di proyectonan cu ta beneficia nos comunidad. Nos ta ehecutando instalacionnan di rednan di Wi-Fi na schoolnan y tambe proyectonan piloto pa sistemanan nobo di enseñansa y nos lo ta financiando un proyecto cu lo bai calcula e valor di nos eco sistema y nos medio ambiente.

AÑA 2016 CU YEN DI RETO

“Nos ta anticipa 2016 como un aña cu hopi reto y mi ta hopi cauteloso pa haci un expresion di posibel nivelnan di entrada cu nos por spera. E cifranan di januari 2016 ta mustra un crecemento modesto compara cu januari 2015. Nos lo ta vigilando e desaroyonan di cerca den e proximo tempo.”

DEFINITIVAMENTE NO TA BUSINESS AS USUAL

Roland finalisa bisando cu definitivamente no ta “Business as Usual” pa SETAR. Cu competencianan poderoso atacando nos diferente liñanan di negoshi ta pone cu nos a cambia nos manera di con nos lo ehecuta pa futuro. “E nivel di confianza den nos economia pa 2016 lo determina e resultadonan pa e aña aki. Tur cos ta depende riba e poder di compra di e comunidad Arubano. Den esaki, desaroyo di e sector turistico, ehecucion di gobierno di su plan di presupuesto y decisionnan cu ta trata e futuro di refineria lo hunga un rol cu lo defini esaki. “