Minister Oduber a confirma cu awe a ‘anula’ su carta di retiro

ORANJESTAD – Minister Otmar Oduber a confirma na NoticiaCla.com cu conforme su palabracion, awe mainta el a manda un carta pa Gobernador di Aruba Fredis Refunjol, cu e meta pa anula e carta di retiro cu el a pone pa drenta na vigor 1 di maart proximo. Cu e acto ey, e carta ey ta oficialmente bira nulo y no tin validez mas, pues Oduber no ta retira mas di e gabinete.

PROCESO SIMAN PASA

E mandatario a confirma dialuna atardi cu diamars siman pasa conseho di minister a trata e puntonan di precupacion y a bay di acuerdo cu Oduber pa atende esaki na un diferente forma. Diabierna ultimo den presencia di e mandatario, e carta ey a wordo ratifica, pues cu esey a cumpli cu e peticion di e mandatario pa ‘bin cu un cambio’ sino e lo no a forma parti mas di e gabinete entrante 1 di maart proximo.

E CRISIS

Tabata comienso di luna pasa (6 di december ) cu Oduber a duna su coleganan minister un ultimatum, sino e lo a saca su conclusion y retira di su funcion. Esey tabata nifica cu (ainda) e no a entrega su retiro, aunke tur indicacion tabata cu esaki lo por a bira un hecho si e ultimatum yega sin logro. Ademas el a confirma cu tabatin un crisis di diferencia di opinion hopi grandi, cu tin entre su persona y gabinete aworaki. NoticiaCla.com a anticipa e dia ey mainta cu pa merdia lo mester tabatin claridad riba e futuro politico di e mandatario. E problema un dia prome riba carnaval, tabata solamente e ‘tip di e ijsberg’. Malcontento, crisis, descontento cu coleganan paden, a conduci cu e mandatario a bin afo cu esaki. Y durante su bishita na gobernador Refunjol, el a splica su posicion.

PROBLEMANAN DEN VARIOS AREA

“Tabatin miho dianan den mi bida sigur cu awe,” Oduber a bisa, confirmando e decision dificil cu el a tuma un dia anterior; retira como minister si no mira mehoracion den e situacion den gobierno. Problemanan cu e tin den area di husticia, cu ta perhudica turismo. Turismo no tabata haya oido di e menasanan mas grandi cu tin, y como tal a dicidi di dun'e atencion mas halto posibel, den forma di e critica cu a bin afo awo. Tambe asuntonan di finanzas cu no tabata haya e atencion segun e mandatario, a pone cu awe e ta den un situacion manera cu el a describi. “Si bo no haya atencion, bo tin cu recuri e ora na tuma decisionnan y esey ta loke mi a participa awe na gobernador,” Oduber a sigui bisa.

CLARIFICACION RIBA RETIRO OF NO

Riba e clarificacion di su posicion como minister, e mandatario a splica cu el a entrega un carta na gobernador, splicando cu pa prome di maart si e no mira un diferencia, un cambio di e maneho specifico riba turismo y finanzas, ta dificil pa como persona e por continua su labor. Loke tambe e mandatario a clarifica, ta cu si e retira mes, no ta papiando (ainda) riba un creacion di un partido politico nobo.

FUTURO POLITICO

Cu e paso di awe, segun comentarionan despues e mandatario a practicamente confirma cu e no ta contento cu e gabinete y cu ta practicamente un hecho, cu su periodo como minister ta yegando na un fin. Comentarionan cu a tende despues, ta mustra cu esaki ta practicamente un ‘done deal’, esta cu e mandatario ta cla cu e gabinete aki, y cu ta simplemente preparando pa bandona su posicion di minister. Esaki, mirando cu den e periodo cu tin te 1 di maart, ta dificil pa trece e cambionan cu e mandatario ta boga p'e.