Asunto di otorga tereno di minister pa minister no ta cos di awor

ORANJESTAD – E discusion cu a cuminsa den fin di siman riba otorgamento di tereno entre un minister y otro minister a continua e siman aki. Tabata e portal Bondia24 cu a ilustra e asunto aki prome. E asunto ta trata e hecho cu minister Otmar Oduber cu a haci un peticion na colega minister (Benny) Sevinger pa un pida tereno, y esaki a keda otorga den apenas 2 pa 3 dia di tempo. Sinembargo informacion cu NoticiaCla.com tin, ta indica cu e minister en cuestion ta purbando pa 2 aña of mas tempo caba pa logra esaki, pero nunca no a haci e peticion di un forma formal.

DOS AÑA PURBANDO CABA

NoticiaCla.com a compronde cu ta for di 2 aña caba cu Oduber ta cana rond cu e pensamento y peticion ‘informal’ pa un pida tereno pa, -manera e peticion ‘formal’ ta bisa-, e por dedica na su hobby cu ta plantamento. Despues di dos aña cu e idea, a mustr'e cu tanten cu no tin nada formal, no por procesa nada. Como tal e mandatario lo a dicidi awor pa manda esaki di un forma formal, por escrito, pa cual colega minister Sevinger a bay di acuerdo pa esaki tuma lugar. Pues no ta algo ‘nobo’ sino algo cu ta cana pa un tempo caba.

CRITICA DEN COMUNIDAD

Esaki no ta kita afo cu e forma rapido cu esaki a tuma lugar (e otorgamento di documento), tabata di un forma cu normalmente lo no a sosode. Esey ta loke ta e critica cu ta den comunidad. Di otro banda, ta keda e prerogativo di e mandatario cu ta duna tereno, pa haci esaki si e ta kere cu ta apropia. Mirando cu e minister solicitando esaki como ‘ciudadano’, pero ta den funcion ainda cu un colega minister, ta haci cu e situacion ta bira uno di interes y beneficio cu normalmente lo no a sosode. Aki ta unda e critica a bin, cu ta favoreciendo un colega minister ainda den funcion, y cu e no ta ‘fair’ pa e ciudadano ‘regular’ cu no tin un minister como ‘colega’ pa regla e asunto aki p'e.

REACCION

NoticiaCla.com a busca contacto cu tanto e mandatario en cuestion (Oduber), y DIP pero te cu merdia, ni e mandatario ni DIP no a reacciona riba e asunto aki.