A cuminsa un accion di "swipe" di punta pa punta di nos isla

ORANJESTAD – Manera anticipa, departamento di salud a cuminsa un accion di "swipe" di punta pa punta di nos isla. "Ta importante pa nos ricibi cooperacion di pueblo den e esfuerso aki cu nos ta realisando. Sin e sosten di comunidad, ta casi imposibel pa nos combati y elimina e sangura cu ta plama Dengue, Chicungunya y Zika", asina Minister di salud Alex Schwengle a duna di conoce.

CUMINSA DEN WEEKEND

Den fin di siman un cantidad di departamentonan di Gobierno, manera ta Departamento di Salud Publico, Gele Koorts en Muskieten Bestrijding, Serlimar, City Inspector y DOW a uni esfuersonan pa cuminsa un "swipe actie" for di punta pa punta di nos isla. A cuminsa na Noord cu intencion di termina den algun siman na e siguiente punta di nos isla, esta San Nicolas.

CHECK TUR CAS

Nan trabou primordial ta pa bishita tur cas, check pa criaderonan, elimina esunnan existente y preveni pa tin criadero dor di tene e luga limpi, bay cu autonan bieu bandona, artefactonan electronico benta den mondi y asina por sigui menciona. DOW a pone como 9 trahado disponibel cu ta sirbi como sosten adicional na e ekipo existente caba di inspectornan di GKMB.

A CUMINSA DEN NOORD

Den fin di siman Minister dr. Alex Schwengle a bay topa e grupo cu apenas a cuminsa cu nan trabounan den e districto di Noord. E mandatario a keda sorprendi di mira cuanto criadero di sangura por tin den un area asina chikito. Tur cup bashi, foambox di cuminda benta den mondi, tur ta bira un criadero asina cu poco awasero yobe riba nos isla.

TRABOU DEN TRES FASE

E trabounan ta parti den tres diferente fase. Den e prome parti e ekiponan di control di GKMB lo bishita e casnan pa check criadero, den di dos fase Serlimar lo duna un man pa elimina tur "grofvuil" y den di tres fase lo fumiga e areanan caminda a topa cu mas criadero y presencia di sangura.

SWIPE TA DURANTE 2 LUNA

Ta bon pa menciona cu pa dos luna largo un total di 12 grupo lo bishita bario pa bario den e districtonan tur rond di nos isla. Casnan habri lo ricibi bishita den siman, casnan cera lo ricibi bishita riba diasabra. Lo fumiga tur bario na momento cu a controla henter e bario. Fumigacion lo tuma luga riba diahuebs, diabierna of diasabra. E lista di districtonan/barionan cu lo wordo bishita ta Noord, dos siman largo lo concentra riba Oranjestad, sigui pa Yaburibari, Paradera, Piedra Plat, sigui pa Santa Cruz y Mahuma, despues ta sigui pa Pos Chikito, Savaneta, Brazil y pa termina na San Nicolas. E intencion ta pa tur bario riba nos isla ricibi bishita di e grupo aki y pa tur bario duna un man pa mas cu por, elimina tur criadero den bo cas y rond di bo cas. Cu e ayudo ey caba nos ta basta leu den cuadro di combatimento di e sangura Aedes Aegypti, cu ta transmiti e virus di Dengue, Chicungunya y Zika.