Minister ta desaproba carta di algemeen directeur di EPI na unit managers

ORANJESTAD  - Minister di enseñansa Michelle Hooyboer-Winklaar por a tuma nota di un carta cu e algemeen directeur di EPI a manda pa e unit managers di EPI a base di nan accion di protesta cu a tuma luga recientemente durante ora di trabou. E carta aki di e algemeen directeur di EPI no a cay den bon tera cerca e unit managers y tampoco cerca e sindicato SIMAR y esaki a conduci mesora na un reaccion di parti di e sindicato na nomber di nan miembronan. Hooyboer Winklaar ta indica di no tabata na altura cu dicho carta a wordo manda pa e unit managers y como tal e carta aki no ta conta cu su aprobacion. E mandatario a wordo notifica door di Dienst Publieke Scholen (DPS), bou di cual Colegio EPI ta resorta, cu e algemeen directeur a manda un carta pa hoofd DPS cu un conseho despues di e accion di e unit managers. E procedura normal ta cu DPS na su turno mester haci e investigacion y conseha Minister como bevoegd gezag den e pasonan cu mester wordo tuma den un situacion asina. Hooyboer-Winklaar ta indica cu e no ta e competencia di e algemeen directeur di EPI pa manda e dicho carta y sigur no prome cu minister como bevoegd gezag a wordo notifica y cu a tuma un decision. Fuera di esey Hooyboer ta bisa di a atende e algemeen directeur tambe riba e tono y e contenido di e carta mirando cu esaki no por conta cu sosten di e mandatario ni tampoco di DPS. Vooral pa loke ta e peticion di e algemeen directeur na e unit managers pa no tene accion y pa distancia nan mes di actividad similar den futuro. Hooyboer-Winklaar ta indica cu esaki no por. E ta enfatisa si cu tur partido tin nan derecho y obligacion pero ta convenci cu na mesa ta unda cu ta yega na un solucion. E oferta na e unit managers ta riba mesa di september 2015 unda cu a base di esaki tabata tin hopi corespondencia entre e partidonan. Mientras tanto un carta di e mandatario a bay diabierna ultimo pa SIMAR unda cu minister ta informa e sindicato di ta tuma distancia y cu ta desaproba e carta di e algemeen directeur y cu DPS ta esun encarga pa conseha minister riba e situacion aki.