DIP a para trabou di cobamento riba Sero Crystal

SERO CRYSTAL – Departamento di Infrastructura y Planning (DIP) a para e trabou na Sero Crystal di un compania cu tabata coba riba e tereno y procesa santo pa construccion. Diasabra ultimo NoticiaCla.com tabata presente ora cu miembro di management team Isabel Dammers a acudi na e sitio personalmente y a informa esnan responsabel, cu nan mester para tur trabou cu ta tumando lugar mesora, te proximo aviso. Segun Dammers, a tuma paso den siman caba ora cu a compronde di e trabounan ilegal cu tabata tumando eynan, particularmente coba riba tereno di gobierno. Y den siman a informa e doñonan caba di e asunto. Pero diasabra a para e compania fisicamente di sigui cu e operacion. Aparentemente nan a continua cu e operacion toch, y ora cu a bin personalmente, a nota cu tabatin ekipo riba tereno di gobierno, cu no ta permiti. Como tal a para tur trabou pendiente un bishita di DIP dialuna na e sitio pa investiga kico exactamente tin cu sosode awo.

PASO TUMA CABA

“Nos a tuma paso caba. Na momento cu nos a haya e melding cu lo tin actividad ilegal going on na Sero Crystal, nos a reacciona mesora, door di haci opname, a papia cu e persona cu ta encarga cu e explotacion, y a combersa y mustr'e cu e no ta autorisa pa coba riba tereno di gobierno, sino solamente riba su mesun propiedad” Dammers a sigui bisa. Segun e miembro di management team di DIP, e persona encarga lo a sigura cu e no ta haciendo esey. “Nos a mustr'e riba dje cu e tin instalacionnan cu ta riba tereno di gobierno cu tin cu busca un solucion p'e" Dammers a sigui bisa. E instalacionnan sinembargo t'ey riba e tereno pa un periodo largo caba di por lo menos 16 aña. “Nos por verifica basta di esey cu e luchtfotos cu nos tin disponibel na DIP”.

DOS SITIO TA WORDO EXPLOITA

E cantidad di areanan cu ta cobando pa santo y otro material ta na dos sitio. Uno ta na Sero Crystal door di un compania riba un tereno eigendom, y tin uno na Sero Plat, cu ta 1 km mas pabou cu tin un compania cu tambe tin un tereno eigendom cu nan ta exploita pa saca material pa construccion. E cobamento a wordo mesora para. “Nan tin cu wordo aangezegd y e la wordo haci schriftelijk tambe cu nos standard carta legal cu nos ta uza ora cu tin overtreding, y cu e no ta permisibel y cu per direct nan mester stop e actividad aki”. Di otro banda no ta rasonabel pa pidi un hende pa kita ekipo cu tin riba e tereno, den dos dia siendo cu e ta 16 aña riba e tereno. “Mester busca un solucion pa esey” segun Dammers, pasobra pa awor nan tin cu keda eynan. Pero a palabra cu riba un termino hopi corto mester remedia esey. Esaki pasobra for di punto di bista di e ROP (Ruimtelijke Ontwikkelings Plan), ta un area di naturalesa y mester regla e asunto di un manera di otro.

PROBECHO PERSONAL DESMENTI

Un di e kehonan tambe tabata cu Dammers mes lo tabata envolvi den e proceso ya cu e lo tabata parti di e companianan envolvi y cu e minister di infrastructura, nan lo tabatin un deal pa enrikece nan mes asina. Riba esey, Dammers tabata hopi corto y a bisa cu esey ta algo absurdo y a desmenti esey categoricamente y bisa cu nada di esaki no ta berdad y ta puro locura inventa.