Despa tin atencion di caso di awa contamina na un hotel

ORANJESTAD - Departamento di Salud Publico a confirma e noticia y a splica cu nan ta na altura cu recientemente diferente turista y trahadonan a bira malo cu dolor di cabes, dolor di stoma y sacamento despues di a bebe awa di cranchi na un hotel. A resulta cu e hotel ta Divi Village, pero ehecutivonan di e hotel no por a bisa nada. Seccion di Higiena di Departamento di Salud Publico ta determinando e situacion na e momentonan aki, door di tuma contacto cu e diferente instancianan di cuido y profesionalnan riba e tereno aki.

ACCION URGENTE PA ALIVIA E SITUACION

Departamento di Salud Publico hunto cu e representantenan di e resort a organisa un accion urgente pa alivia e situacion y a tuma tur e medidanan necesario pa contene y coregi e daño mas lihe posibel. E sistema di awa potabel di e resort a wordo trata bou di guia di Departamento di Salud Publico. Por informa cu e investigacion a demostra cu e contaminacion di awa a sosode riba tereno di e hotel mes y no cu e awa a yega na e resort contamina. Departamento di Salud Publico a haci test microbiologico na e red di tuberia general di awa di WEB y a conclui cu e calidad di awa ta completamente segun norma.

COLECTANDO TUR INFORMACION

Awor aki Departamento di Salud Publico ta colectando tur informacion di esunnan cu ta presentando cu e sintomanan di dolor di cabes, dolor di stoma y sacamento, pa establece un link clinico epidemiologico. E hotel conhuntamente cu Departamento di Salud Publico lo bay establece causa di e contaminacion di awa. Lo laga X-ray e sistema di tuberia cu ta bou tera pa por saca afo unda e contaminacion por ta. A involucra PAHO pa duna asistencia mas pronto posibel cu un experto pa contene e situacion mas lihe y completo posibel.

ACUDI CERA DOCTER DI CAS

Departamento di Salud Publico ta enfatisa cu na momento cu un persona bira malo cu sacamento y/of diarea y ta sospecha cu e por a come of bebe algo cu tabata contamina, pa acudi cerca su dokter di cas. Tur dokter di cas tin e obligacion di meld esaki na Seccion di Malesanan Contagioso di Departamento di Salud Publico. Pa di e forma aki Departamento di Salud Publico por tin un miho bista riba e casonan di contaminacion y por eherce un investigacion mas rapido y eficiente posibel. Pa mas informacion por tuma contacto libremente cu Departamento di Salud Publico na tel. 5224200.

CONTAMINACION TA NA HOTEL SO

Ta enfatisa cu e contaminacion ta isola na e hotel so y no ta den sistema di suministracion general di awa di WEB. E sistema di tuberia di WEB ta diseña di tal forma cu dificilmente un contaminacion isola por bay bek den e tuberia di WEB. Den WEB su red di tuberia tin punto di control cu ta cera e sistema pa evita contaminacion di e suministro general. Regularmente tanto laboratorio di WEB como Landslaboratorium ta test awa di bebe na puntonan strategico den e red di distribucion di WEB bou guia di e seccion di Higiena.

PRIORIDAD TOTAL

Ta bon pa sigura comunidad cu tur instancia concerni, esta Departamento di Salud Publico, WEB y Aruba Tourism Authority tin e situacion aki como prioridad y ta trahando conhuntamente pa soluciona e situacion cu a presenta.