Polis corupto Venezolano deteni na Venezuela riba peticion di Aruba

ORANJESTAD – Autoridad di Aruba a haya confirmacion cu polis Venezolano a detene e sospechoso envolvi den exportacion di arma di candela for di Venezuela y benta di arma di candela den forma ilegal riba nos isla. Haciendo un trabou profesional di investigacion, uzando tacticanan moderno, polisnan di Aruba a logra yega na un di e sospechosonan Venezolano cu ta bende arma di candela na Venezuela y a manda arma pa nos isla. Via canalnan hudicial policial a comparti inteligencia local. Venezuela hasiendo uzo di informacion di Aruba a detene Juan Carlos Lugo, naci na Venezuela di 26 aña di edad, trahando como Polis na Estado Falcon. El a keda deteni hunto cu varios otro sospechoso.

HABRI CAMINDA

Husticia di Aruba a habri caminda pa Ministerio Publico di Venezuela cu e detene un polis corupto di nan cu ta sospecha di ta comete un acto criminal na su pais y tawata coopera cu criminalnan na nos isla. Lugo ta polis den e municipio di Carirubana na Estado Falcon.

MAS DETENCION

Separa di e Polis, tambe a detene 3 homber y 1 hende muhe mas. Ta sospecha cu tur di nan ta envolvi den un red di trafico di arma di candela. E sospechosonan ta Juan Carlos Lugo (26) y su pareha Johana Carolina Gutierrez (26), Edgardo Alberto Rangel (26), Alexander Miguel Vivas (25) y Denis Jesus Rodriguez (33). Na momento di nan detencion, Polisnan Venezolano a haya nan cu un arma di candela, 3 auto, un cantidad grandi di placa efectivo y otro elementonan di interes pa e investigacion criminal.