Aki un luna gobierno mester paga Bouldin & Lawson

ORANJESTAD – Un siman despues cu huez a dicta sentencia contra pais Aruba pa e compania Mericano Bouldin & Lawson (B&L), e compania HJC Engineering a entrega e ultimo ‘performance certificate’ na B&L cu na su turno por prepara e ultimo cobransa miyonario pa pais Aruba. Esey lo sosode den e proximo 30 dianan segun abogado di B&L David Kock a splica NoticiaCla.com, despues di cual gobierno mester cumpli cu e pago. E caso tabata pa forza e compania HSC Engineering pa otorga B&L e ultimo certificado, pa asina por completa e contract di trabou pa por a traha e proyecto cu mester a crea fluff di sushi procesa. Un proceso cu lamentablemente nunca a mira luz di dia.

PROCESO LARGO

Segun Kock, e proceso tabata uno largo di 7 aña, unda cu por lo menos den un otro ocasion tambe, mester a bay Corte pa por a logra pa e compania cu ta provee e certificado di prestacion, entrega e certificado. A splica cu cada fase di e proyecto, mester a entrega un certificacion di cumplimento pa e compania na su turno por a cobra gobierno pa su trabou. Varios fase a tuma lugar, pa cual e compania a ricibi su debido pago. E fase prome cu ultimo tambe, sinembargo no a bay facil, y a termina den Corte.

GOBIERNO A HACI FASTIOSO

Ora cu a toca e ultimo fase, tambe gobierno a haci fastioso segun Kock, y a pone cu e compania responsabel pa otorga e ultimo certificado, a para esaki cu consecuencia cu B&L no por a cobra su ultimo fase. Esey tabata e motibo principal pa e caso aki tuma lugar cu B&L a gana di gobierno y e compania cu mester entrega e certificado.

FAYA DI DEMONSTRA INCUMPLIMENTO

Durante e caso, huez a mustra cu prueba, cu gobierno a faya den varios forma di demostra nan argumento cu e compania B&L no a e.o. cumpli cu nan trabou, a mal informa gobierno di loke nan por a presta y produci y presenta, y asina tin un sin fin di punto cu segun huez, no por a wordo proba. Como tal huez a mustra cu mirando e hecho cu e defensa di gobierno no a logra convence y establece cu B&L a actua malo, a mustra cu ta rechasa ponencia di gobierno, y ta duna B&L rason pa cual a duna gobierno 3 dia pa produci e certificado, sino tin un multa di mil florin pa dia te na maximo di 100 mil florin. Diabierna ultimo, B&L a ricibi e certificado final. Lesa e sentencia di e caso aki.