Timmermans: Aruba no tabatin e autoridad pa dicidi riba inmunidad di Carvajal

DEN HAAG/ORANJESTAD – Aruba no tin e autorisacion pa dicidi riba inmunidad di un diplomatico, y pesey e decision a bin di Hulanda pa dicidi cu ex general Carvajal tin e inmunidad. Y consecuentemente basa riba tratado di Viena, mester a laga e persona aki den libertad mesora. Asina minister di relacionnan exterior hulandes Frans Timmermans ta contesta miembronan di tweede kamer di hulanda diabierna (lesa e carta cu preguntanan aki) . E la contesta tur 6 pregunta cu e miembronan di parlamento hulandes a manda pe pa por trece claridad.

Tambe e mandatario ta confirma cu mientras ta berdad cu Venezuela a protesta contra e detencion di e ex general venezolano Hugo Carvajal, e mandatario no ta uza e palabranan ‘menasa serio’ manera cu e miembronan di Tweede Kamer a haci den e carta. E contestanan riba pregunta # 3 y 4 tabata esun cu pa hopi na Aruba a hala mas atencion, esta e motibo pa libera Carvajal, y e clarificacion di Timmermans riba e tarea di cada pais den e cuestion aki. Y aki a sali pues na claridad unda Aruba su autoridad tabata sinta y unda e la termina tambe.

Aruba tin como pais autonomo, -segun splicacion di Timmermans-, e derecho pa detene un hende of no ya cu esaki ta un asunto hudicial cu ta un cuestion autonomo di e isla. Pero segun Timmermans, e asunto ta caba ey tambe. Pasobra ora cu mester a bin dicidi riba e relacion diplomatico di e persona, ta e minister di relacionan exterior, -pues Timmermans-, so tabatin e autoridad pa dicidi tal. Algo cu e mandatario a haci tambe e diadomingo ey tambe.

Loke no a keda cla pa hopi (segun reaccionnan riba e.o. medionan social na Aruba) den e contestacion, ta na ki momento Hulanda tabata sa of no, di e inmunidad y pakico a laga husticia na Aruba yega asina lew pa prolonga e detencion, -un autoridad di Aruba ainda-, pa despues wordo ‘overruled’ dos dia despues. NoticiaCla tin di su fuentenan diplomatico cu e asunto tabata un ‘falta di comunicacion’ entre e canalnan diplomatico entre Aruba y Hulanda, y husticia di Aruba cu a pone cu e cos a yega asina lew.

Loke tampoco no a haya contestacion, ta e motibo pakico a anjadi e cargo di ‘persona non grata’ na Carvajal diadomingo ora cu e ex general a recobra su libertad. “Mi no sa e motibo” Dowers a contesta NoticiaCla riba e pregunta ey diadomingo durante e conferencia di prensa. Y como cu e parlamentarionan hulandes no a haci e preguntanan aki tampoco, e contesta ey ta keda pendiente.