Mester sigui paga ex trahadonan di Westin

ORANJESTAD - Huez ta rechasa e peticion di retiro di por lo menos 18 trahado di ex Westin hotel. Esaki ta e veredicto cu a cay diamars den Corte. Segun raportahe di e matutino BON DIA ARUBA, hues no a haya suficiente proba cu e futuro operador  esta RIU PALACE, no tin trabou pa e trahadonan aki. Segun Hues cu a trata e caso aki, e hotel a haci un trabou pober di demonstra cu e hotel den su bachi nobo, mester retira e grupo di trahado aki. Pa cuminsa, mester por demonstra a base di cifranan bayendo atras dos anja, cu e hotel tabata perde placa, pa hustifica un reduccion di personal manera cu e hotel a bin ta haci. Ademas, no por a presenta un plan di maneho unda cu por saca afo cu berdaderamente den e structura nobo, no tin lugar pa e trahadonan nobo. Si ta asina, e hotel mester a presenta un documento unda cu ta presenta tur funcion y descripcion, y compara esaki cu esun di e e hotel anterior. Asina hues por mira si enberdad no tin un espacio pa e trahadonan cu a wordo retira y cu a demanda e hotel den un caso sumario.  Mester menciona cu e grupo aki ta e unico cu a dicidi di protesta e retiro, contrario na e gran mayoria cu a acepta nan pakete di retiro y a ricibi a cambio, un suma di placa cuantioso como recompensa. Pa loke ta e trahadonan cu a gana nan caso, segun e relato den BON DIA ARUBA, ta papia cu nan lo ricibi nan pago te ora cu e hotel cuminsa opera bou di operacion di RIU Palace.