Huez ta dicidi otro siman riba impasse na Elmar

ORANJESTAD – Huez tin cu dicidi si e welga di e trahadonan di Elmar tabata husto e siman aki, y si nan tin cu wordo paga pa e 8’ora di welga. Tin un diferencia di opinion entre e trahadonan y e gerencia riba esaki y como tal huez tin cu dicidi ken tin rason. E asunto cu a escala cuminsamento di siman (riba asunto di security), a pone cu e trahadonan a dicidi di protesta diamars ultimo, lidera pa dos sindicato UEA y ALVAST. Gerencia a entama un caso sumario pa nan para e accion mirando cu nan ta perhudica e operacion di e compania. A haya un ‘orde maatregel’ cu un multa pega na dje pa e trahadonan reanuda trabou, cual nan a haci tambe.

NENGA PA PARA CASO

No obstante e hecho cu trahadonan a bay traha, segun abogado di e trahadonan, -esta David Kock-, Elmar a insisti pa continua cu e caso cu a tuma lugar diabierna merdia. Na fin di e caso, huez a determina cu tin cu dicidi si ta pone un prohibicion na e trahadonan pa sigui tuma mas accion of no. Algo pues cu lo sosode pa otro siman diaranson.

SENTENCIA OTRO SIMAN

Kock ta mustra cu a purba convence e compania pa revoca e caso, pero a insisti. “Elmar kier pa den futuro ora cu tin mas issue, cu sindicato ta wordo prohibi pa tuma accion. Pues huez tin cu dicidi si ta na lugar pa trahadonan por bay den accion den futuro. Nan kier prohibi (e trahadonan) desde awor caba, cu segun mi huridicamente tin su problemanan” Kock a sigui bisa. “P'esey nan (Elmar) a persisti pa e caso bay door. Nos a pidi pa huez rechasa e peticion di Elmar.

VERSION DI ABOGADO DI ELMAR

Abogado di Elmar, Dello Gomez ta wak e caso diferente. Segun Gomez, a impone un medida di orden ‘pa salvaguardia e suministro di coriente’. Durante e caso awe segun Gomez, sindicato a confirma cu nan lo no welga mas pa e asunto di e controlamento di badge y lo ‘lag'e te ey’. “De facto loke a keda punto di discusion, ta cu gerencia a aplica e proceso di no work no pay pa e 8 oranan cu no a wordo traha”. E medida di orden ta keda na vigor te ora cu huez dicta sentencia.

VOLUNTARIO OF NO

Un di e diferencianan di opinion segun Gomez ta cu e trahadonan ta bisa cu nan a bay traha bek voluntariamente, pero esaki no ta berdad. “Trahadonan a bay traha pasobra un orde maatregel a wordo duna. Dus pa e motibo ey mester a persisti cu e demanda” Gomez a bisa.