En bes di di lastra y menasa specialista, haci denuncia

ORANJESTAD – E situacion cu a surgi recientemente den caso di baby Lunah, unda cu a bay asina leu di acusa mediconan y insulta nan y te hasta menasa nan, a bay mucho leu. Director di hospital Ezzard Cillie visiblemente indigna, a kibra silencio di hospital brevemente diahuebs merdia durante un conferencia di prensa riba Zika. E mensahe tabata cla. Nos docternan ta di confia, y si cualkier persona tin keho riba nan, keha nan na e forma corecto pero no lansa calumnia contra nan mas. E ta referi na e hecho cu specialistanan (pediatra nan) a wordo lastra ora cu nan lo a duna nan opinion riba e caso di baby Lunah recientemente.

TUR DOCTER TA TRAHA BON

“Ora cu mi bira malo mi kier bosonan sa cu no tin un docter aki den cu ami lo no durf di bay cerca dje. Pasobra mi ta confi'e y mi ta bay cerca dje” Cillie a bisa. E director a mustra cu e declaracion cu el a haci, ta pa prensa y comunidad eyfor compronde cu e caso (cu a insulta y lastra mediconan riba e.o e caso di baby Lunah) ta uno hopi serio. “E hecho cu mi ta scohe hopi biaha pa no reacciona ariba dje ta pasobra mi no kier complica ni bida ni trabou di e specialista, pasobra nan ta specialista.

MAS RESPET PA DOCTERNAN

Locual nan a haci pa yega caminda cu nan ta, no ta nos tur por. Ami sigur cu no tabata por” Cillie a bisa. E ta sinti cu nos mester por lo menos tin poco mas respet pa nan. “Y si nos no ta di acuerdo cu nan, pasobra esey ta nos derecho tambe, tin otro caminda pa bo cana. Y mi deseo lo ta pa esey wordo encamina tambe inclusive cu bo ta bay na direccion di salud entrega bo keho” Cillie a bisa. Y e ta garantisa cu algo lo sosode pasobra hospital tambe mester responsabilisa su mes bou di esun cu ta tene auspicio riba nan.

A MENASA Y BLACKMAIL DOCTERNAN

Segun Cillie, tin specialista cu ta wordo te hasta terorisa, y blackmailed (menasa) personalmente. “Ami lo no durf haci esey, pasobra ta e mesun medico cu mi ta menasa awe, mayan mi ta drenta akinan hopi malo y ta e mesun medico mester pordona'mi y bay yuda'mi". Esey ta pasobra e medico no tin e opcion. “E mester yudabo pasobra esey ta su deber. E no por scohe. Sino e ta haye cu inspeccion cu salud” Cillie a sigui bisa. Como tal e director kier a mira con pa resolve e asunto aki. Y un biaha mas el a mustra cu e ta referi na e caso di e baby Lunah cu tabata hopi malo pa cual el a keda transporta pa Colombia.