DESPA satisfecho cu control di higiena durante Carnaval

ORANJESTAD - Departamento di Salud Publico (DESPA) a tene varios control durante e temporada di Carnaval, prome cu paradanan y eventonan y por conclui cu mayoria di e bendedonan di alimento y bebida a cumpli. Esaki ta e esfuersonan di varios aña cu Departamento di Salud Publico a traha riba tereno di concientisacion y por mira un resultado hopi positivo, segun inspector di alimento, Yvette Geerman.

REUNION CU INSTANCIANAN

Departamento di Salud Publico a tene varios reunion cu varios instancia y trahando conhuntamente cu diferente instancia riba e tereno di concientisacion, por nota un resultado asina aki. Entre otro locual cu Departamento di Salud Publico a traha hopi ultimo tempo riba ta nan foyeto di concientisacion. A parti‘e durante e temporada di carnaval cerca tur esnan cu a bay bende cuminda. DESPA a tuma contacto cu esunnan cu a bin na remarca pa un buffet vergunning y a informa nan locual ta e reglanan cu nan mester cumpli cu nan. Tambe a splica kico ta e importancia di e reglanan di higiena, con pa anda cu cuminda, etc.

RESULTADO POSITIVO

Por constata cu tabatin un resultado positivo, Geerman a indica. Si compara tur e actividadnan cu a tuma luga, cada un actividad riba su mes, den cuminsamento tabata tin algun cos cu no tabata na nan luga. Tin un of dos luga cu no tabata tin nan jug cu awa optimal na ordo, pero na final di carnaval, tur luga a cumpli cu e reglanan cu mester a cumpli cu nan. Departamento di Salud Publico ta mira atras riba un resultado hopi positivo, den e esfuersonan haci pa tur esunnan cu a bende cuminda durante e eventonan publico di carnaval. Yvette Geerman a conclui bisando cu pa DESPA ta importante cu tur ta compronde e importancia di con pa anda cu cuminda corectamente y cumpli cu e reglanan di higiena.