Schotte: Si mester castiga, castiga ami pero no kita yiu di su mama

WILLEMSTAD – “ Si mi mester haya un castigo, castiga'mi, pero no kita e yiu di su mama!” Ta momentonan emocional awe mainta ora cu Gerrit Schotte a haya chens pa dirigi su mes na huez den caso Babel”. “Mi tin dianan hopi pisa tras di lomba” Gerrit Schotte a bisa huez durante tratamento di e caso awe mainta. Despues di dupliek di abogadonan awe mainta den caso Babel, sospechosonan Gerrit Schotte y Cicely vd Dijs tabata na palabra. Den un corte tempo el a repasa su bida completo pa duna un bista di kico tur el a pasa aden, y cu e no ta un criminal manera cu hopi ta pensa.

REPASANDO SU BIDA

E ta cuminsa bisa cu su mayornan a diborcia ora cu e tabatin 14 aña. Debi na e situacion ey, el a bira un rebelde y na 18 aña el a bira un drop out. Segun Schotte, OM a califica esey pa yam'e un mal hende. “Mi ta lamenta cu mi no tabata mas fuerte y cu mi por a caba scol” e ta sigui bisa. “Mi tabata un mucha, no un criminal. Si mi por a cambia algo, mi lo a caba mi scol”, Schotte a sigui bisa. E tin e soño ainda pa haci algo bon pa Corsou. Pero OM ta crea asesinato di caracter, algo cu nunca e por a pensa.

SUBI LISTA POLITICO

E ta mustra cu dia 20 di april 2007 el a subi un lista politico pa prome biaha, aunke cu e no ta bin di un famia politico ni uno tradicional cu coneccion. “Como politico bo tin cu sacrifica hopi. Bo tin enemigo, hende cu ta contra bon, hende cu kier kibra bo. E ex prome minister a repasa su tempo tambe den e funcion aki. “Como premier, mi a pasa den tur cos cu bo por pasa. No tin limite. Como tal mi tabatin hopi intrankilidad den mi bida” Schotte a sigui bisa. Un cos cu a afect’e hopi tabata e entrada hudicial y su detencion den studio di CBA. Aki Schotte a bira emocional y cuminsa yora, y unda cu su partner a bandona e sala. “Mi mester a pensa riba Cicely.. unda nan lo a tene (cera)” Schotte a sigui bisa."

MOMENTONAN DI DETENCION

Schotte a repasa e momentonan di detencion, con cos nunca mas tabata mescos. “A dura hopi prome cu nos cas tabata un cas atrobe”. Si mi ta asina corupto y mafioso, con bin cu mi partido ta e unico cu ta cumpli cu entrega di cifra anual?” Schotte ta puntra. “Bo ta husga mi futuro. Bo tin cu wak kico mi a haci malo. No duna un mama cu tin un yiu, un castigo”. Schotte a bisa finalmente. Huez a cera e caso y ta dicta sentencia 11 di maart proximo pa 8:30 di mainta.

Foto: Anneke Polak .. raportahe Caribisch Netwerk