Fiscal ta respeta y cuestiona silencio di Schotte den caso Babel awe

WILLEMSTAD – E di dos dia di tratamento di caso Babel (caso cu ta encera ex prome minister di Corsou Gerrit Schotte y su partner Cicely vd Dijs) a inicia awe mainta 9’or. E prome dia tabata diaranson unda cu a trata e acusacion contra e dos sospechosonan, a pidi castigo, y a sigui cu e defensa di e acusadonan. Awe mainta a sigui cu e repliek y dupliek di partidonan. E caso ta programa pa finalisa den curso di dia unda cu tanto Schotte como vd Dijs tin e ultimo palabra, pa despues determina e sentencia riba un fecha cu tin cu fiha ainda. Te cu awor, ambos a uza nan derecho di keda keto.

RESPETA SILENCIO

Na inicio di e caso, fiscal Rip den su repliek a mustra comprension pa e decision di e sospechosonan pa nan derecho di keta keto. A mustra cu no por papia di un complot contra e dos acusadonan, sino mas bien ta persigui nan pasobra tin prueba cu a comete actonan castigabel serio. E investigacion tabata legal y door di informacion y denuncia for di Italia, tabatin motibo pa un investigacion penal segun Rip.

DISCUSION ENTRE ABOGADO

A surgi un discusion entre abogado di Schotte y Rip ora cu Rip a acusa e abogado (Sulvaran) di ta practica ‘trial by media’, door di bay corant di su ruman homber. Aki abogado di Schotte a protesta unda cu huez a mustra e abogado cu mas laat e lo a haya su turno. E hecho cu ta reclama cu a uza prueba cu a lek di veiligheidsdienst no ta corecto segun Rip pasobra no a ni uza e informacion ey como prueba. A mustra tambe awe mainta cu tabatin un cooperacion hopi estricto entre Schotte y vd Dijs, segun pruebanan presenta segun Rip.

CORUPCION DI AMBTENAAR

A mustra tambe cu pa corupcion di funcionario publico, no ta necesario pa tin un contra prestacion. Ta trata aki segun Rip di tumamento di placa sabiendo cu ta desea un contra prestacion pa e placa paga. Rip a sigui pa cuestiona Schotte su silencio den corte. “Si Schotte no a haci nada malo, pakico e no ta duna un splicacion” Rip a puntra. Te aki e repliek di Rip tabata awe mainta. A sigui e dupliek di abogado Sulvaran, abogado di Schotte. (lesa otro articulo).