Ex minister Jamaloodin ta keda sera, Dos Santos ta liber

WILLEMSTAD – E peticion di e caso sumario pa laga ex minister di finanzas George Jamaloodin den libertad a keda rechasa. Di otro banda, e catochero Robbie Dos Santos  (cu a cay sera diamars ultimo) si a wordo libera mesora a consecuencia di e sentencia di Hues Comisario. Esey e vocero di Ministerio Publico Guillano Schoop a declara diabierna merdia na Corsou. Diahuebs Jamaloodin a cumpli un siman sera, riba sospecho di ta un di e intelectualnan responsabel pa morto di politico Helmin Wiels. E ta sospechoso den e caso “Maximus”. Jamaloodin mientrastanto a termina su welga di hamber tambe . 

Tambe ta conoci mientrastanto cu Ministerio Publico Corsou a entrega dia 31 di juli 2014 un keho serca Conseho di Supervision (Raad van Toezicht) i Deken di Orden di Abogado contra abogado Chester Peterson di e bufete di abogado Sulvaran & Peterson. E keho tin di haber cu e comunicado pa prensa cu mr. Peterson a emiti e siman aki den cuadro di e investigacion Maximus. Mr. Peterson a cita informacion for di e dossier den e comunicado sin cu e tabata autorisá pa hasi esaki. Mr. Peterson ta abogado di G.R.M.J. Fiskal di Ministerio Públiko a entregá e sospechoso G.R.M.J. un orden cu medidanan restriktivo. E orden ta buta cu e sospechoso no mag drenta den contacto cu otro hende pa di e forma aki e no comunica cu terser parti tocante e caso penal. E meta di e orden di medidanan restrektivo ta pa evita cu e investigacion ta ser strobá i pa evita cu sospechosonan por sincronisá nan declaracion. Esaki yama “collusie gevaar”.

Tur wowo lo ta riba Corsou entrante dialuna awor 4 di augustus ora cu e caso di asesinato di Helmin Wiels cuminsa. A reserva por lo menos 5 dia pa e caso aki y ta wordo transmiti via un link di internet.