Operacion di baby Lunah ta mustra di a bay bon awe tardi laat

CALI/ ORANJESTAD – Despues di mester a warda algun dia, awe tardi laat docternan a opera baby Lunah porfin na Colombia. Y e ciruhano a sali bisa algun rato pasa cu e operacion ta mustra cu a bay bon. “A pone un sonda pa cuminda mesora na stoma”. Awor ta wardando con e curpa lo sigui reacciona riba e operacion di awe. E baby su estado ta sigui delicado, pero e operacion pues ta mustra di a bay bon segun informacion cu NoticiaCla.com a ricibi for di Colombia.

OPERACION NECESARIO 

Baby Lunah mester di un operacion. Asina su mama ta raporta riba su pagina di Facebook e weekend tras di lomba .”E mester di un operacion, no tin opcion” e mama ta bisa. “E ta riscante, y e ta fragil, pero aworaki no tin otro opcion. Problema ta cu e estado di salud actual di baby Lunah, no ta permiti e mediconan haci e operacion rekeri. Mientrastanto ta haciendo tur otro procedura medico pa su salud mehora di otro forma."

OPERA DIASABRA

Segun e mama su version, Lunah mester a opera diasabra, pero muestranan di sanger a mustra cu e tabatin un infeccion den su sanger, cu nan ta kere cu casi sigur tabata di e abces (postema) riba su man causa pa e IV (e tubo medico pega riba e man). “Pues operacion riba su parti di stoma a wordo posponi” e mama ta sigui bisa. Di otro banda Lunah a opera si, pero uno mas chikito pa pone un cateter (sonda) den un ader mas grandi cerca di su curason pa por suministra remedi, cuminda likido y tuma muestra di sanger. Pues e situacion ta keda delicado, pero ta haciendo tur cos pa mehora e situacion di e baby.

AZV

For di AZV NoticiaCla.com a wordo informa cu nan a informa tur loke tabata por a informa, pero debi cu ta trata di un pashent, no ta bay duna mas informacion cu ta protocol di AZV normalmente. Manera ta conoci no ta usual cu ta duna informacion asina di pashentnan den exterior. Aunke den e caso aki, baby Lunah ya a bira un caso publico cu tin hopi interes di comunidad den su salud.

BIAHE PA COLOMBIA

Tabata siman pasa cu despues di basta evaluacion, baby Lunah a biaha pa Colombia pa busca miho oportunidad pa su salud. Tabatin un discusion si e por a bay of no, debi cu consehonan medico na Aruba y den region y Hulanda tabata desconseha pa haci tal. Pero e famia a insisti cu mester a mand'e afo. Despues di deliberacion, AZV a dicidi cu ta mand'e, pero riba responsabilidad di e famia. A pone nan firma un documento cu ta responsabilisa nan mes pa e consecuencianan, aunke cu AZV ta cubri tur e gastonan envolvi.