Minister cu reaccion riba critica di e nombernan homenahea riba plaza Turismo

ORANJESTAD – Na du debido tempo lo homenagea mas persona di e mundo di turismo. Asina e titular di turismo Otmar Oduber a bisa NoticiaCla.com awe mainta. E ta basa riba e critica cu lo a laga personanan clave di turismo for di e monumento di Ike Cohen riba Plaza Turismo. E mandatario ta na altura di e critica cu tabatin riba e hecho aki, y a mustra cu ta custumber cu ora cu un hende no haci algo, tambe ta malo. “Si bo haci manera tur otro a haci, osea nada, no tin critica awe. Pasobra no tin monumento, nos no a reconoce niun hende”.

MIHO SPLICACION

E mandatario a admiti cu porta mester duna un splicacion miho di con a scoge e personanan cu a keda homenagea riba e monumento. E ta mustra cu esnan cu ta prome riba e monumento, ta e pioneronan den turismo, osea esnan prome cu a haci algo pa e mundo di turismo y un diferencia door di e vision cu nan tabatin na un forma innovativo pa cu turismo. Mes momento e ta reconoce cu e lista di hende cu a contribui cu turismo ta hopi largo. A haci mencion di entre otro Adwina Arends y asina tin hopi mas.

COMISION SPECIAL

Tin un comision den cual tin personanan manera Rori Arends, Michael Kuiperi y mas. “Hende pa reconoce tin na cantidad. Sinembargo a haci un escohencia pa reconoce e pioneronan awor” Oduber a bisa. Den un proximo tanda lo tin mas nomber cu lo bin acerca riba e mesun monumento. “A bisa cu lo tin mas nomber!” Oduber a sigura NoticiaCla.com. Tin un clasificacion y rekisito pa un nomber por bin eyriba. No ta djis a pone nomber sin mas segun Oduber.