Frankel: No tin obstaculo pa seguronan mes atende cu accidente leve awo

ORANJESTAD – No tin nada pa para e proceso di companianan di seguro mes pa cuminsa 1 di maart awor pa tuma e reportahe di accidente over. Asina presidente di asociacion di seguro Diego Frankel a bisa diaranson. Segun Frankel, durante un reunion den Parlamento diaranson ultimo, esaki a keda demostra. No tin ningun duda, ningun problema pa cuminsa cu e proceso aki proximamente Frankel a sigura. Esaki despues cu algun parlamentario a vocifera e problema cu nan tabatin cu e proceso aki y a pone esaki den un mocion recientemente durante tratamento di e presupuesto. E mocion aki a keda rechasa sinembargo.

OTRO LUNA TA CUMINSA

Segun Frankel, tur cos ta cla cu pa comienso di otro luna, e companianan di seguro mes lo atende cu casonan di accidente, contal cu e accidente ta uno cu no tin herido, tin solamente blikschade y cu no mester di presencia di polis. Esey ta pone cu polis por wordo uza pa cosnan mas ‘urgente’ envez di atende accidentenan di trafico ‘leve’. Pa varios aña caba a cuminsa cu e proceso di ‘road service’ unda cu tabata asisti polis cu e yenamento di papel y registracion di e accidente.

COMPANIA TA CLA

Cu entrenamento y bon palabracion, companianan di seguro mes ta capaz awor pa registra tur documento den un caso di accidente. Loke segun Frankel ta sosode awor, ta cu tur cos ta sosode mas rapido aworaki. Si antes tabata dura hopi pa por keda cla cu registro di un accidente, aworaki den cuestion di e siguiente dia caba, companianan di seguro di tur documento di un accidente cu a tuma lugar un dia prome. Antes esaki tabata dura mucho mas largo debi na entre otro tardansa pa ricibi e rapport di polis. Esey no ta necesario mas aworaki. Pues e rapidez cu cual e documentonan ta wordo procesa, sigur ta un beneficio grandi pa e clientenan di ambos partido den caso di un accidente.

A KITA INQUIETUD

Frankel a sigura NoticiaCla.com pues cu durante e tratamento den Parlamento, tur inkietud a wordo kita for di mesa y tur cos ta cla pa por cuminsa oficialmente cu e procesamento di documento pa seguronan mes entrante 1 di maart proximo. No tin ningun obstaculo pa por cuminsa cu e ‘proyecto’ aki. Esey ta nifica cu entrante e fecha ey, no mester di polis mas den caso di accidente si tur cos (fuera di daño na auto) ta ok. Polis lo por ta presente, pero poco poco esaki lo bira menos. A mustra cu otro paisnan caba no ta uza polis mas pa accidente di trafico leve, pues na Aruba tambe a bira tempo pa haci esaki awor.