IAA: Mayoria compania ta cumpliendo cu ley obligatorio di pensioen

ORANJESTAD – Companianan priva ta cumpliendo grandemente cu e ley di pensioen obligatorio cu a drenta na vigor 1 di januari 2012. Asina presidente di asociacion di seguro Diego Frankel a bisa. Un grupo chikito sinembargo ainda no ta cumpliendo, y ta haciendo tramite pa nan tambe cumpli cu esaki. E ley a keda pasa 4 aña pasa, y awor ta asina leu cu por bisa cu e companianan ta ‘up-to-date’ cu nan por atende cu e proceso aki. E ley ta forsa tur compania awor, con grandi of chikito cu ta, cu e mester percura pa un pensioen pa su trahado. E fondo ta uno comparti entre e trahado y e doño di trabou.

ADMINISTRACION NA ORDO

Loke tin cu haci sinembargo ta percura pa e administracion ta na ordo, manera cambionan cu por sosode den e compania. Entre otro ta pensa riba cambio di trabou, salario, posicion y otro cosnan cu mester ta registra. Esey por bay miho ainda. Tambe companianan cu ta registra cu no ta cumpliendo cu e pago, tambe ta un problema cu ta trahando ariba. E cantidad no ta grandi, pero pa chikito cu e por ta, e compania mester cumpli segun Frankel.