Barcelo negoshando ainda cu operador nobo di casino

ORANJESTAD – E propietario di e casino na Occidental Hotel, esta Barcelo, no ta cla ainda cu e operador nobo pa anuncia ken nan ta. “Nan ta negoshando e ultimo detayenan” ta loke cu minister di labor Paul Croes a sigura NoticiaCla.com diamars. Segun Croes, e no a gaña ora cu el a bisa cu a haya un operador nobo pa casino. “Mi a reuni un bes mas un rato pasa cu e vergunninghouder, esta Barcelo” Croes a sigura NoticiaCla.com.

NO A GAÑA

Segun Croes, biaha pasa loke el a bisa, ta loke a sosode. “Mi no a gaña biaha pasa. Mi a informa locual e gerente a informa mi” Croes a sigui bisa. Aki e ta referi na e informacion cu el a duna algun siman pasa, bisando cu tin un operador nobo pa e casino. Sinembargo nos no a tende nada mas pa algun siman despues. “Nan ta negoshando e ultimo detayenan” Croes a bolbe reitera. Sinembargo e no a duna un fecha fiho di ki dia por spera un noticia definitivo.

DEAL ANUNCIA PERO NADA A PASA

Tabata algun siman pasa cu Croes a bin afo y anuncia cu mester tin trankilidad pasobra porfin a logra haya un operador di e casino cu a cera su porta fin di aña pasa. A bisa e tempo ey cu ta cuestion di un siman despues pa firma y keda cla. Sinembargo no a divulga e nomber di e compania of operador nobo. Mientrastanto e trahadonan a keda den un incertidumbre, incluyendo e sindicato cu ta representa nan, esta FTA. E sindicato su presidente a bisa cu nan tambe ta den scuridad y no a tende nada mas y ta duda cu tin algo cu a sosode.