Figaroa: Waf di container na Barcadera a cuminsa opera oficialmente

ORANJESTAD – Mudamento di e operacion di waf di container pa e waf nobo na Barcadera ta un realidad. Director di Aruba Ports Authority NV (APA), Jossy Figaroa, tabata diamars mainta na Barcadera, hunto cu minister Mike de Meza y director di ASTEC, Mike d' Lisle presenciando e prome barco di carga cu a drenta e waf nobo di Aruba y wordo procesa. Riba e prome dia di operacion, Figaroa a trece dilanti dos ponencia principal riba e prome dia di operacion: E prome ta cu e ta hopi orguyoso di e ekipo di trabou cu a ehecuta e proyecto y, di dos, cu Aruba henter por ta orguyoso di e waf nobo y e potencial cu e ta representa pa e futuro economico di e isla. Adicionalmente, Ing. Figaroa a indica cu un bes cu ta completamente cla na Barcadera, e enfoke total ta bin riba e desaroyo di e tereno di waf na Oranjestad como espacio publico y terminal exclusivo pa barconan crucero.

MAS ESPACIO PA BAPOR DI CONTAINER

“Nos ta hopi contento mirando e trayecto cu nos a pasa aden pa logra locual tin awe. Manera nos por a mira awe mainta dos barco di container mara na waf, loke no tabata posibel na Playa. Esey ta algo hopi bunita,” E capacidad di e waf nobo ta permiti te cu tres barco di container pa mara pareu. “E importante di esaki ta e desaroyo cu nos ta bay haya despues. E ‘spin off effect’ cu ta bay tin den e area di Barcadera ta loke ta importante,” e director di APA a splica.

CONCRETISA TUR ASUNTO PENDIENTE CU WAF NOBO

Siguiente riba e schema di trabou di APA ta pa concretisa tur asunto pendiente cu waf nobo. Entre nan, lo traspasa tereno pa wordo desaroya y despues di esey, tur atencion lo ta pone riba e embeyecimento di e area nan Playa cu awor a keda bashi y ta destina pa bira un terminal di crucero di nivel, ademas di espacionan publico.