Ta evalua pa tene Yellow cera na Aruba mes of den exterior

ORANJESTAD – Autoridad ta evaluando si Milanchelo Trenidad, conoci como ‘Yellow’ lo keda encarcela na Aruba mes of ta haci'e otro caminda. Asina minister di husticia Arthur Dowers a reacciona riba e captura y e proceso cu e homber Yellow tin cu pasa aden awor. “Awor aki e momento crucial a yega, door cu Ministerio Publico tin cu laga scucha e persona aki y bay over na pone e acusacionnan den su contra y esey ta haci cu e lo permanence encarcela por lo pronto. Na e momento aki ta investigando si esaki lo tuma luga na Aruba mes of si pa motibo di siguridad lo mester encarcel’e otro caminda” Dowers a bisa.

MAS HENDE POR BAY CERA

No ta descarta (manera cu a wordo bisa dialuna tambe pa fiscal mayor Olthof) cu mas hende lo por wordo deteni, e mandatario a bisa. “Ministerio Publico a informa cu a detene un persona mas den e caso aki y probablemente esaki ta e persona cu lo a coopera cu’e cu e por a keda tanto tempo scondi, pero mester haci investigacion mas profundo, mira cu ta e persona aki so a yud’e of cu lo tin mas persona envolvi, e ora lo mira e cargo cu lo bin contra e persona aki tambe. Mester realisa si cu e persona aki tabatin sosten di un of mas persona”. E minister ta pensa mas, pasobra pa keda scondi den un area asina, bo mester tin cooperacion di mas hende pa por informa ki ora autoridad ta yega cerca y tambe importante ta pa percura pa e persona tin facilidad pa por keda na bida, cuminda, etc. Kiermen esaki toch ta un trabou bon orchestra door di mas hende.

ACTUA CONTRA E GRUPO

E Minister no lo keda sorprendi cu den e simannan cu ta sigui, autoridad lo actua contra e grupo aki, por ta den un netwerk tiki mas grandi, pasobra ta un grupo di hende cu ta sostene criminalidad, maldad y pa criminalnan por permanece den comunidad. Aunke e persona tabata scondi, toch el a keda for di gara di husticia pa algun siman y esey no tabata posibel si e no a haya sosten cu el a haya di gruponan cu ta dispuesto pa sostene crimen den nos pais, e mandatario a comenta.

EVALUA SI INFORMACION PA CREA PANICO TA CASTIGABEL

Tin un grupo di persona liga na partido MEP pa crea un panico na comienso di carnaval, ta lamenta profundamente cu a informa cu e persona aki lo a bay comete atentado contra comunidad. Esey absolutamente no tabata e caso, pasobra asina cu tin indicacion cu cualkier persona kier haci daño na nos pais, tur departamento ta bin hunto, ta actua di biaha y ta informa comunidad di cualkier peliger. Esaki ta algo sumamente lamentabel y mester mira si e cosnan aki por ta hasta castigabel. Mester evalua si ta keda tolera cu e tipo di cosnan aki ta pasa den comunidad, creando asina caos y panico den nos pais.