CITGO a inscribi cuater compania na Camara di Comercio pa cuminsa

ORANJESTAD – Presencia di e compania CITGO na Aruba ta birando mas y mas visibel. Por lo menos riba papel. Den e matutino Bon Dia Aruba su editorial, a revela e informacion crucial cu CITGO a lanta no menos cu 4 compania fin di luna pasa. Tur cu intencion pa opera asina cu e compania establece su mes na Aruba. Segun e editorial, tabata dia 29 di januari cu a registra e cuater companianan aki na Camara di Comercio. Citgo Aruba Refining, Citgo Aruba Terminal NV, Citgo Aruba Marine Operations NV y Citgo Aruba Sales & Marketing NV. Tur tin un solo director cu ta IMC International Trust.

INTENCION DI CITGO

Interesante segun e editorial, ta e contenido y intencion di e companianan, mirando e palabracionnan cu a wordo haci den pasado.

Segun e editorial, den e situacion actual esaki ta bay funciona un poco diferente, ya cu a anuncia caba cu Citgo no ta desea di adkiri propiedad, pero kier yega na un convenio di lease pa varios aña. “ Manera gobierno a anuncia e intencion ta pa lanta un compania estatal cu lo bira propietario di e facilidadnan. No ta conoci cu esey lo bay directamente, den e sentido cu e compania ta bira propietario di tur e propiedadnan, o cu e lo fungi como compania ‘madre’ pa e companianan cu awor ainda ta conoci como e companianan bao number di Valero” e editorial ta sigui bisa.

MERCADEO

Loke cu e editorial ta remarca tambe ta cu Citgo a lanta tambe un compania pa mercadeo y distribuido di combustibel na Aruba, mientras cu gobierno a bisa cu tabata busca un partner local pa tuma e parti aki cu awor ta cay bou di un compania separa di Valero. “ Di e registracion di un compania di Citgo pa e parti aki por comprende cu nan ta interesa pa bay haci esaki tambe. Esaki significa talbes cu e partner local cu gobierno tabatin na bista no ta interesa mas? En todo caso no lo ta asina cu e refineria, si e habri atrobe, lo bay entrega tur producto produci na Aruba mes” e editorial ta sigui bisa.

GOBIERNO TA DESMENTI INFORMACION DI REUTERS

Manera cu NoticiaCla.com a raporta caba den un otro articulo, gobierno di Aruba a reacciona riba e articulo di Reuters di diasabra, desmintiendo grandemente e loke a wordo bisa. Entre otro cu Valero lo no kier deshaci di e terminal di almacenahe, y cu nan lo no tin responsabilidad ambiental ora cu nan bay. Por lesa e articulo completo aki.