Boneiro tin prome caso di Zika y Corsou a aumenta te na 35 caso caba

WILLEMSTAD – Bonaire tin su prome caso di virus Zika, y na Corsou e cantidad a aumenta te na 35. Aruba ainda e cifra ta na 4 pasobra for di dia cu a informa di e cifra, no a informa cu tin mas. Hecho ta cu tur tres isla tin casonan registra cu e virus, y ta premira cu dentro di poco e cantidad lo por aumenta drasticamente.

ZIKA NA BONEIRO

Departamento di Salubridad Publico di Entidad Publico di Boneiro a ricibi e notificacion di un caso di Zika confirma. E pashent probablemente a haña e virus na Boneiro. Pa motibo cu e malesa cerca 75% di e personanan infecta ta desaroya sin sintoma, no ta improbabel cu ya diferente persona na Boneiro a haña Zika caba.

CORSOU

Na Corsou, ta minister di Salud Siegfried Victorina a contesta pregunta den parlamento riba e virus. Aki durante su presentacion el a confirma cu tin 35 hende infecta cu e virus na Corsou. Mes momento el a sigura si cu ningun di nan ta muhernan na estado. E ta un cantidad explosivo, si mira cu na comienso di luna, tabatin 4 caso, cu rapidamente a bira 6, y pa 10 di februari tabatin 14 caba. Apenas diasabra ultimo un total di 14 persona den un solo tiro a keda añadi riba e lista ey. Como tal e total awor ta na 35.