Grammys a presenta ganadornan pero tambe fayonan di artista

LOS ANGELES – E celebracion di premio mas cotiza di musica Mericano Grammys a presenta ganadornan dialuna anochi, pero tambe perdedonan. Di un banda, Bruno Mars, Taylor Swift y Ed Sheeran tabatin motibo di ta contento, mientras cu artistanan manera Adele y Rinanna tabatin momentonan cu nan no kier corda. Na tur, e anochi tabata uno di celebracion, homenahe y logronan comparti. Entre nan homenahe pa David Bowie y Glenn Frey cu a fayece recientemente, y Lionel Richie pa su trayectoria di mas di 30 aña den musica. 

GANADORNAN

E ganadornan principal tabata Mark Ronson y Bruno Mars cu a gana disco di aña, Uptown Funk, Taylor Swift cu a gana album di aña cu 1989, cancion di aña pa Ed Sheeran y Amy Wadge (Thinking Out Loud), y artista nobo di aña Meghan Trainor. Mira e lista completo aki.

RIHANNA

Rihanna a yega te e facilidad (StaplesCenter) pero mester a bandona e sitio despues cu tabata bisto cu e no por a cana. Despues di a tuma antibiotica pa tres dia largo, docter a bise dialuna atardi laat cu e ta duna un sosiego di voz pa 48 ora pa evita cu e por afecta su voz permanentemente. E intencion tabata pa Rihanna canta “Kiss it better”.

ADELE

Adele su presentacion mester tabata e ‘highlight’ di anochi, pero tabatin fayo grandi den e presentacion, pero no di su banda. Aparentemente e ingeniero di sonido a haci un fayo cu e microfon y e sonido, cu a pone cu durante su presentacion di e cancion “All I ask”, diripiente tabatin un silencio, un bashi y un Adele cu su cara tabata mustra perdi ‘den espacio’. El a recupera pero tabata bisto cu su presentacion tabata tur cos menos e Adele cu nos ta conoci di dje. Na final el a reacciona brevemente riba e incidente, mustrando cu a faya cu e microfon di e piano y cu esey a bay falso tambe. Mira e parti di presentacion cu a bay malo aki.