Fundacion Basilio Kelly: Mas di 15.000 florin recauda pa baby Lunah

ORANJESTAD – Fundacion Basilio Kelly a recauda mas di 15.000 florin caba pa baby Lunah, e baby cu a haya popularidad ora cu su situacion di salud delicado y limita a keda presenta recientemente. Ayera e fundacion a raporta e logro aki y tambe kico tur ta haciendo awor pa cu e baby.

EXCEPCION

Segun e fundacion, ora cu fundadornan di Fundacion Basilio Kelly a tende cu Lunah tin problema y e tin cu bay afo pa su salud, nan a haci un excepcion y a ofrece e cuenta bancario di nan fundacion pa di e forma aki brinda un salida na e famia di Lunah, cu den un tempo masha cortico mester a busca un manera pa por yega na fondonan pa por logra hiba Lunah afo pa un second opinion y su operacion. Desde e momento cu a tuma e decision di yuda Lunah yega na e fondonan pa e por logra bay afo a sali flyers y comunicadonan ariba social media cu e nr di cuenta ariba dje pa asina un y tur cu kier a aporta na e caso por a haci esaki libremente.

SUMA RECAUDA

Den nomber di Fundacion Basilio Kelly y famia di Lunah, nos kier bisa DANKI na cada un di boso cu a hasi un donacion pa Lunah ariba e cuenta bancario di Fundacion Basilio Kelly. Sin boso aporte lo no a logra e suma grandi di Afl 15.602,58. Nos ta masha contento di e ayudo na Lunah y su famia den e momentonan dificil aki. Un bes mas danki di curason na un y tur!

FORZA PA BABY LUNAH

Fundacion Basilio Kelly ta desea tur cos bon pa Lunah y hopi forza y perseverancia na su mayornan pa sigui cu e lucha. Cu Dios bendishon’e y sigui cuid'e pa pronto e por tey bek aki cerca su sernan keri. " Nos kier pidi Aruba henter pa por favor tene fe y sigui resa pa Lunah. Pa mas informacion y updates di Lunah por bishita e pagina di Facebook, Yuda Lunah of email na yudalunah@gmail.com.