Arends: Ta negoshando fondo di limpiesa cu refineria Valero

ORANJESTAD — Gobierno di Aruba ta negoshando cu Valero riba e creacion di un fundacion riba limpiesa, pa ora cu e refineria wordo traspasa pa pais Aruba. E operador nobo CITGO lo tuma e fondo aki pa su cuenta despues y ta keda responsabel pa tur aspecto ambiental di e refineria. Asina e consehero di gobierno Richard Arends ta reacciona riba noticia den prensa internacional.

NOTICIA DI REUTERS

Manera cu NoticiaCla.com a raporta diadomingo caba, diasabra e agencia noticioso Reuters a publica un articulo unda cu varios fuente ta raporta cu Valero lo keda ‘libera’ di cualkier responsabilidad ora cu nan bandona e refineria. Tambe cu e doño actual di e refineria lo kier keda cu e terminal.

FONDO DI LIMPIESA

Segun Arends, ta desmenti cu Reuters a papia cu partidonan envolvi (cu e negociacion). Segun Arends, ta intencion pues cu Valero lo financia e fondo di limpiesa ambiental completamente, y cu CITGO lo tuma loke resta di e fondo y sigui cu ne ora cu e limpiesa a tuma lugar y nan bira e operador di e refineria. Segun Arends, nan ta papiando awor cu Valero riba con grandi e fondo aki lo mester bira y ki tipo di limpiesa e fondo lo cubri. Cu Valero lo no kier laga e terminal, tampoco no ta berdad segun Arends. Arends, cu ta lidera e negociacion cu CITGO, ta bisa cu CITGO lo ta responsabel completamente pasobra nan ta tuma tur responsabilidad ambiental di Valero. "Mescos cu ora cu bo huur un cas. Bo ta asumi cu e huurdo, ora di bandona e cas, laga esaki manera cu el a hay'e”. Riba con e refineria ta wordo laga, ta wordo negosha aworaki.

NEGOCIACION

Segun Arends e meta ta pa tin un acuerdo definitivo na maart ta riba schedule ainda. Diabierna ultimo tabatin negociacion y e siman aki lo intercambia di documento atrobe cu CITGO, pa otro siman e negoshacionnan fisico por continua atrobe. E puntonan di e acuerdo preliminar na december segun Arends, ta keda intacto.

ACUERDO DETAYA

E negoshado ta bisa cu e acuerdo final ta bira un poco mas detaya cu esun cu tin cu Valero. “Cu Valero, hopi cos a sosode a base di bon boluntad. Cu e conocemento y experiencia cu nos tin awor, nos kier sigura mucho mas cos. Entre nan, nos kier pa CITGO opera e refineria pa e duracion completo, y no manera cu Valero cu a dicidi pa diripiente pasa solamente pa opera e terminal di almacenamento. Lo bin un schema di inversion, tambe pa aspectonan ambiental, pa asina por traha un refineria pa siglo 21” Arends ta finalisa bisando.

Partner Ret Karibense . Autor: Ariën Rasmijn.