PVV: Aplica husticia di stranhero riba Antiano criminalnan

DEN HAAG – Den Tweede Kamer dialuna partidonan a reacciona riba e proposicion di ley di Sietse Fritsma y Machiel de Graaf (PVV) pa saca Antiano criminal for di e Hulanda. Fritsma: “Corsou ta hasi esaki caba. Ta straño cu ta un problema si ora ami propone pa distingui entre pais di origen.”

PROPOSICION

E proposicion di ley mester percura pa saca hende di Corsou, Sint Maarten of Aruba cu haña sentencia na Hulanda pa motibo di un crimen. Den e caso aki ta distingui entre doño di pasaporte Hulandes a base di nan pais di nacemento. Fritsma no ta mira esaki como problema: “Bo ta mira cu Corsou ta pone exigencia na Hulandes Europeo cu no ta conta pa e pueblo propio. Esey kiermen distingui entre pais di origen. Si Corsou hasi esaki no ta un problema, kiermen ta un medida cu ta existi masha tempo caba”

ESCALA MOBIL

Si lo saca un Hulandes condena cu ta bini di e paisnan Caribense di Reino ta depende di e asina yama escala mobil. Mas tiki tempo na Hulanda, mas grandi e chens riba expulsion. Fritsma: “Kiermen bo no por bisa cu un delito semper ta causa expulsion. Pero si den un aña despues cu bo a yega na Hulanda bo comete un echo castigabel, lo sigui expulsion.”

E mesun areglo ta conta den derecho di stranhero. Por saca stranhero cu un permit di estadia despues di un sentencia dependiente di e escala mobil. Cu e ley di Fritsma ta iguala Hulandes di e paisnan Caribense di Reino na hende cu un permit di estadia. “Nos ta haña e comparacion balido pasobra den tur dos caso ta trata di hende di un otro pais”, Fritsma ta bisa.

CRITICA

Anteriormente Raad van State a husga negativamente riba e proposicion di ley. Partido di gobierno PvdA ta rechasa e proposicion pasobra e ta distingui entre Hulandes. “Manera Raad van State a conclui caba, no tin un motibo husto pa e ley discriminatorio aki.” Pero partido di coalicion VVD ta bisa cu nan ta comparti e preocupacionnan tocante e cifranan di criminalidad di Antiano. Anteriormente e parlamentario André Bosman a entrega un proposicion di ley pa pone exigencia di establecimento na Antiano. SP ta conclui cu e ley di Fritsma ta causa desigualdad, D66 ta haña cu ta un infraccion di nacionalidad Hulamdes indivisibel. CDA ta pensa cu huridicamente no por mantene esaki.

Di Partner Ret Karibense     Autor Pieter Hofmann   Foto: Jamila Baaziz