CAFT: No a ricibi presupuesto aproba 2016 di pais Aruba ainda

ORANJESTAD / WILLEMSTAD – E colegio di supervision financiero di Aruba CAFT, no a ricibi e presupuesto aproba di Aruba ainda. Asina e oficina a confirma na NoticiaCla.com dialuna. “Aunke cu ta conoci si cu Gobernador a firma esaki y a establece esaki”, e colegio a sigui bisa. Esey ta nifica tambe cu tanten cu e colegio no ricibi e presupuesto, e no por controla esaki y tampoco duna su conseho ariba. E presupuesto di pais Aruba pa pais 2016 a keda aproba prome siman di februari ultimo. Esaki despues cu a duna gobierno di Aruba un extension di e fecha stipula (te 31 di januari 2016 en bes di 15 di december 2015 ), cu toch ainda no a keda cla y despues a bolbe duna nan maximo un siman mas pa e keda cla.

FECHA PA RICIBI PRESUPUESTO

“No ta conoci pa CAFT ki dia e presupuesto aproba lo keda publica. Posiblemente esaki a sosode caba, pasobra e presupuesto a keda trata den Parlamento” e organo a sigui bisa. Y ta depende di e momento cu e presupuesto yega CAFT pa por sa ki dia e conseho di e colegio bira publico. Unabes cu CAFT ricibi e presupuesto aproba, e lo cuminsa cu su trabou di analisa esaki. “Esey ta nifica cu dentro di dos siman (despues) e conseho di CAFT lo wordo manda pa minister di Finanza, y despues di tres siman lo keda publica riba e website di CAFT”, e colegio ta finalisa bisando.

NOTA DI CAMBIO

Ta conoci cu den e presupuesto aproba, no tabatin ningun nota di cambio (nota van wijziging), esta cu no a haci ningun cambio riba dje cu ta nifica tambe cu no a inclui e consehonan di e colegio financiero. Si esey ta nifica cu e por crea un problema y cu e colegio no lo aproba e presupuesto, no ta conoci. Esaki pasobra segun minister di finanzas Angel Bermudez, tin un palabracion entre gobierno di Aruba y e colegio cu pa mei lo sinta hunto pa wak con a sigui cu e desaroyo di e presupuesto, y si enberdad mester trece cambionan pa sea un nota di cambio of no. Y aki si ta necesario, gobierno a priminti caba cu nan lo no tin problema pa haci tal. Pero e motibo pa warda te mei, ta pa wak con e negoshacionnan cu CITGO y Valero ta desaroya. E plan di gobierno ta pa uza e deal di CITGO como e fuente di entrada extra pa financia y cubri e deficit. Si no logra esey, e ora lo papia cu CAFT riba e siguiente plan. Pues pa awor, gobierno no ta kere cu lo tin un ‘conseho negativo’ di parti di e colegio di supervision.