Resultado bishita secretario van Zwol silencio hermetico

ORANJESTAD / DEN HAAG – Tanto na Aruba como na Hulanda tin un silencio hermetico riba e situacion di presupuesto 2014 di pais Aruba. NoticiaCla a compronde di su contactonan fededigno na tanto Hulanda como Aruba, cu no ta papiando nada nada riba e topico aki por lo pronto. Tur esaki mientras cu secretario general hulandes pa asuntonan di relacionnan di Reino Hulandes Richard van Zwol a bishita Aruba e siman aki y atende entre otro cu e asunto di presupuesto 2014 di Aruba. “No tin nada pa raporta aworaki” tabata e reaccion general cu NoticiaCla a ricibi for di Hulanda diabierna mainta. Tanto di Aruba su representacion di Hulanda, como oficina di minister Plasterk.

Di otro banda NoticiaCla a tende di su fuentenan fidedigno cu van Zwol no tin problema pa e presupuesto por wordo firma, pero e mester ta condiciona si. Kico e condicionnan aki ta, NoticiaCla no por a haya sa pa motibo di e silencio hermetico. “Nada no a cambia, e investigacion ta continuando su caminda” tabata e contesta cu NoticiaCla a haya for di Hulanda.

For di gobierno di Aruba, NoticiaCla a haya confirmacion solamente for di comienso di siman cu e bishita lo tuma lugar y cu gobierno lo a bay papia cu e persona aki. Esaki NoticiaCla a haya directamente for di premier Mike Eman. Pero no tabatin ningun comunicado di su bishita, ni ningun otro tipo di raportahe haci riba e tema aki.