KPA: Pueblo por ta trankil awor cu Yellow ta deteni!

MACUARIMA – Mientras cu Fiscal Mayor Eric Olthof a confirma solamente cu pa awe tardi 10 pasa di 2 polis a captura e fugitivo conoci como Yellow, mucho mas no por a saca for di e conferencia di prensa di polis dialuna merdia na Centro di Husticia na Macuarima. Olthof a confirma cu fuera di Yellow, a gara un otro persona tambe aunke no ta conoci kico su envolvimento tabata y esey ta wordo investiga aworaki. No ta descarta tampoco cu mas detencion lo por cay den e caso aki.

HOPI ESFUERSO PA DETENE YELLOW

Segun Olthof, autoridad tabata hopi tempo ocupa cu e caso aki (e tiroteo mes a sosode di 7 di december 2015), pero finalmente e tabatin resultado. “Hopi departamento tabata envolvi y hopi tip a wordo investiga. E la tuma hopi tempo, capacidad pero finalmente un cos tabata cla; nos no ta entrega y finalmente tambe e sospechoso aki lo por wordo deteni. Y esey a keda logra awe merdia” Olthof a sigui bisa. RST, AT (Arestatie Team y otro instancianan tabata crucial den e operacion aki).

LAMENTO PA ASISTENCIA CU YELLOW A HAYA PA SCONDE

Pa loke ta e alto comisario di polis Dolfi Richardson, el a splica cu nan tabata sigur cu lo a gara e persona aki. “Pueblo por ta trankil cu e persona aki ta deteni” Richardson a bisa. A gradici tur colega cu a traha dia y nochi incansablemente pa por a logra e captura aki. Mes momento Richardson a lamenta cu personanan den comunidad a presta nan mes pa yuda e fugitivo door di hopi hende. “E ta algo toch cu a molestia mi personalmente cu tin hende cu ta leen nan mes pa yuda hende asina. E ta algo hopi lamentabel” Richardson a bisa.

DETENCION SIN RESISTENCIA

E detencion mes a sosode trankil unda cu Yellow a entrega su mes sin resistencia y no tabatin arma den su poder ora cu a gar’e. Tampoco por papia di un golden tip specifico sino mas bien un cantidad di tip hunto cu a conduci na e captura di Yellow. Como tal niun hende en particular lo por ricibi e recompensa den e caso aki segun Richardson.