Hulanda: E cadena di tienda popular V&D ta keda cera por lo pronto

AMSTERDAM – Tiendanan grandi Hulandes V&D (Vroom & Dreesman) lo keda cera por lo menos un luna y mey mas. Ni si e comerciante Roland Kahn logra anuncia un toma di e cadena di tienda popular aki, lo dura un tempo prome cu por habri nan atrobe. Asina e vocero di curatornan di e cadena di tienda a declara na e corant Hulandes Volkskrant.

PERSONAL NOBO

Pa por continua cu e cadena di tienda, mester di personal nobo, almacena e lugarnan y instala e tiendanan di nobo. Algo cu segun e vocero Edwin van Wijk no ta cos cu por haci di un dia pa otro.

KAHN

Kahn ainda no a sali for di e asunto di e huurdonan di e tiendanan. Como tal e curatornan a pidi tres dia extra pa por yega na un areglo. Riba esey no tabatin ningun comentario negativo. Segun e curatornan, e partidonan envolvi lo simplemente sigui papia. E ultimatum final a vence 12’or di merdia dialuna ora di Hulanda.

PERSONAL

E personal lo wordo poni pa inventarisa e filialnan den e proximo dia, cu mes momento ta nan 2 ultimo dianan di trabou cu nan ta wordo paga door di e instancia cu ta pagando nan, esta UWV.

PLAN DI KAHN

E intencion den e plan di e doño di e compania Coolcat, ta pa den por lo menos 35 di e 62 establecimentonan, lanta un V&D nobo. Pero no ta conoci si ta bay logra esaki ainda. Un di e exigencianan di Kahn, ta pa den e proximo 2 añanan, e tarifa di huur keda reduci cu mitar. Banda di esey e doñonan individualmente mester inverti den nan negoshi, instala esaki y remodela nan. Hopi di e tiendanan ta den mal estado.