Pa zomer tin proposicion pa geschillenregeling

DEN HAAG – Minister Ronald Plasterk (Asuntunan Interior y Relacionnan den Reino) prome cu zomer lo entrega un proposicion pa un areglo di disputa. Esey el a priminti diabierna den Tweede Kamer. Plasterk ta bisa cu e tin basta tempo ta trata di yega na un acuerdo cu e paisnan caribense den reino. Te ainda no a yega na un acuerdo di disputa.

PRODUCTO INTERMEDIO

P’esey prome cu zomer Plasterk ta bini cu un producto intermedio, caminda e ta habri e palabracionnan cu e otro paisnan. Si esaki no logra, e ta hasi un proposicion via Conseho di Minister di Reino. Si ta posibel prome cu 1 di juni. “Esaki mester bai Raad van State prome si, y despues ta envolve e paisnan. Esey ta un trayecto largo.

INTERPRETACION

E areglo di disputa ya pa añanan ta un problema. Segun e mandatario tin cuater asunto di contenido cu ta dificil pa alcansa un acuerdo pa nan: e definicion di un disputa, con leu e areglo por yega, e instancia autorisa pa resolve e disputa y na final e caracter obligatorio di e sentencia.

STATUTO

Pa cuminsa tin e pregunta ken ta dicidi si ta mira un asunto como un disputa. Diabierna Plasterk a bisa cu a base di Statuut e ta haña cu por uza e areglo di disputa si un pais ta sinti'e perhudica pa motibo di un decision. “Si un pais haña cu ta trata di un disputa, e ora ey aparentemente ta trata di un disputa.”

PROPOSICIONAN ANTERIOR

Proposicionnan anterior tabata kier pa Conseho di Minister di Reino husga si ta trata di un disputa. Esaki tabata contra boluntad di e paisnan caribense. P’esey e interpretacion di Plasterk ta mas amplio: “Mi a accede riba e punto aki.”

CONSECUENCIA

Segun e minister esaki mester tin consecuencia pa cua instancia ta resolve un disputa y tambe pa e caracter obligatorio di e sentencia – dos otro punto di disputa importante. Despues tin e diferencianan di opinion tocante e alcance di e areglo.

Ret Caribense Autor: Pieter Hofmann