Na Colombia a conseha cu Baby Lunah mester opera

CALI – Baby Lunah mester di un operacion. Asina su mama ta raporta riba su pagina di Facebook e weekend aki.”E mester di un operacion, no tin opcion” e mama ta bisa. “E ta riscante, y e ta fragil, pero aworaki no tin otro opcion. Problema ta cu e estado di salud actual di baby Lunah, no ta permiti'e mediconan haci e operacion rekeri. Mientrastanto ta haciendo tur otro procedura medico pa su salud mehora di otro forma."

OPERA DIASABRA

Segun e mama su version, Lunah mester a opera diasabra, pero muestranan di sanger a mustra cu e tabatin un infeccion den su sanger, cu nan ta kere cu casi sigur tabata di e abscess (postema) riba su man causa pa e IV (e tubo medico pega riba e man). “Pues operacion riba su parti di stoma a wordo posponi” e mama ta sigui bisa. Di otro banda Lunah a opera si, pero uno mas chikito pa pone un cateter (sonda) den un ader mas grandi cerca di su curason pa por suministra remedi, cuminda likido y tuma muestra di sanger. Pues e situacion ta keda delicado, pero ta haciendo tur cos pa mehora e situacion di e baby.

AZV

For di AZV ainda NoticiaCla.com no a haya nada oficial ainda, y no ta sigur cu esey lo bin pasobra no ta usual cu ta duna informacion asina di pashentnan den exterior. Aunke den e caso aki, baby Lunah ya a bira un caso publico cu tin hopi interes di comunidad den su salud.

BIAHE PA COLOMBIA 

Tabata siman pasa cu despues di basta evaluacion, baby Lunah a biaha pa Colombia pa busca miho oportunidad pa su salud. Tabatin un discusion si e por a bay of no, debi cu consehonan medico na Aruba y den region y Hulanda tabata desconseha pa haci tal. Pero e famia a insisti cu mester a mand'e afo. Despues di deliberacion, AZV a dicidi cu ta mand'e, pero riba responsabilidad di e famia. A pone nan firma un documento cu ta responsabilisa nan mes pa e consecuencianan, aunke cu AZV ta cubri tur e gastonan envolvi.